Di pêşengiya TJA, DBP û DEM Parityê de civînên gel ên der barê banga Rêberê Gelê Kurd Abdullah Ocalan a Aştî û Civaka Demokratîk de hefteyek e didomin. Gel di civînan de aştî û aramiyê dixwaze. Dixwaze rêxistinên bajar û navçeyan komînan ava bikin û bêtir di nava gel de diyalog û temasê xurt bikin.
Gel piştgiriyê dide banga Rêberê Gelê Kurd Abdullah Ocalan û bawer dike ku bi Aştî û Civaka Demokratîk bi ser bikevin.
Rêberê Gelê Kurd Abdullah Ocalan di 27ê Sibatê de banga Aştî û Civaka Demokratîk kir. Di bangê de got: “Rêzgirtina nasnameyan, azadiya ramanê, rêxistinbûna demokratîk, avakirina civakî-aborî û siyasî ya hemû pêkhateyan, tenê bi hebûna civak û qada siyasî ya demokratîk mimkin e” û xwest bêtir Kurd bêtir siyaseta demokratîk pêş bixin. Dîsa di peyama ku ji bo jin û ciwanan şandibû de jî xwest ku li her derê xwe bi rêxistin bikin. Li ser banga Rêberê Gelê Kurd Abdullah Ocalan Rêxistinên TJA, DBP û DEM Partiyê plansaziya nêzî 2 hezar civînên gel amade kir û li gelek bajarên Kurdistanê dest bi civînên gel kir. Di çarçoveya plansaziya civînên gel de di serî de li Amedê li gelek bajarên din jî civînên gel tên li darxistin. Li Amed û navçeyên wê hefteyek e her şev li tax û navçeyan civîn tên lidarxistin. Di rojên dawî de li Agirî, Îdir, Şirnex û gelek bajarên din jî civînên gel tên lidarxistin. Di civînan de dîwan perspektifa ku ji bo pêvajoyê hatiye amadekirin bi pêkhateya civînê re parve dike. Di civînê de pirs û nirxandinên gel tên girtin û li ser wan pirsan nirxandin tên kirin.
‘Diyaloga bi gel re xurt bikin’
Di çarçoveya civînên gel ên ji bo nirxandina pêvajoyê û parvekirina perspektifa bagna 27ê Sibatê ku Rêberê Gelê Kurd Rêber Abdullah Ocalan bi raya giştî re parve kiriye de, şevê din jî li Navçeyên Hênê û Bismilê yên Amedê civîna gel hatin lidarxistin. Di civînan de bi sedan kes amade bûn. Li Navçeya Hênê bi tevlêbûna nêzî 100 kesan civîn pêk hat. Di civinê de welatiyan anîn ziman ku fikarên wan ji dewletê heye ku dîsa Kurdan bixapînin û xwestin vê carê neyên xapandin. Welatiyan destnîşan kirin ku di nava partiyê de rêxistinî û diyaloga bi gel re lawaz e û xwestin beriya her tiştî aliyê rêxistinî û temasa bi gel re bê zêdekirin.
Li gundê Îsapar ê navçeya Bismilê jî civîna gel hat lidarxistin. Di civînê de zêdetirî 100 welatî amade bûn. Li vir jî heman daxwaz û rêxne hatin kirin. Welatiyan anîn ziman ku ew heta dawî piştgirî didin banga “Aştî û Civaka Demokratîk a Rêberê Gelê Kurd Abdullah Ocalan û gotin: “Ji bo ku ev pêvajoya dest pê kiriye bi ser bikeve em ê têkoşîna xwe xurtir bikin. Bi salane dayîkên me daxwaza aştiyê dikirin. Ev bang ji bo pêkhatina daxwazên dayikan ên aştiyeke mayînde derfetan diafirîne. Em ê bı Perspektîfa “Aştî û Civaka Demokratîk Bi Ser Bikevin.”
Îdir
Li Taxa Ozgur a Navenda Îdirê jî civîna ewil a gel hat lidarxistin. Zêdeditî 100 welatî beşdarî civînê bûn. Li vir jî civînê bi rêzgirtinê û parvekirina perspektifê dest pê kir. Di civînê de welatiyan anîn ziman ku ew aştî û aramiyê dixwazin û dixwazin Kurd tifaqa xwe xurt bikin.
