Çûna herêma Sefîne ya Çiyayê Cûdî dema bi AKPê û dewletê re be serbest e, lê gel bi serê xwe nikare biçe wir.
Li gor baweriya Misilmantiyê Herêma Sefînê ya Çiyayê Cûdî ji ber ku keştiya Hz. Nûh li ser rûniştiye erdê cihek pîroz tê dîtin û gelê herêma Botanê bi sedan salan meha Tîrmehê diçe tewafa Sefîneyê. Lê Piştî salên 1990an pêve dewletê herêm qedexe kir û heya niha ev qedexe berdewam dike.
Di salên dawî de ji aliyê Walîtiya Şirnex, Şaredariya Şirnexê ya AKPî û Diyanetê ve Merasîma Bîranîna Hz. Nûh tê lidarxistin û ev yek ne li gorî çand û baweriya misilmantiyê pêk tê.
Îro jî bi tevilbûna Serokê Karên Diyanetê Alî Erbaş, waliyê Şirnexê û rayedarên dewletê ve ev merasîm weke ku ew nav dikin ‘cara sêyemîn pêk hat. Ji ber ku tenê dema rayedarên dewletê û AKPê vê organîzsazyonê pêk tînin destûr heye gel biçe Sefîneyê gelê herêma Botanê yê oldar neçar dimîne û dîçe tewafa Sefîneyê.
Li gel ku rê heye maşîne biçin heya ser Herêma Sefînê jî destûr ji bo gel tunebû. Tenê rayedarên dewletî yên ku bi firokeyê hatine ser Çiyayê Cûdî bi maşîneyan çûn Herêma Sefîneyê.
Her çiqas Walîtiyê û şaredariya AKPî ji bo merasîmê dik û cih veqetandibin jî armanca gel ew bû ku xwe bigehîne Sefîneyê û îbadeta xwe pêk bîne. Hemû welatiyên ku em pêre axaftîn û ji ber ewlehiyê nexwestîn dîmen bidin gotin ku çi eleqeya wan bi vê bernameyê tuneye û ew tenê ji bo tewafa Hz. Nûh hatine. Her wiha welatiyan anîn ziman ku tenê dema dewlet bixwaze serbest dike û ew jî neçar dimînin vê rojê werin.
Her çiqas amadekarên vê bernameyê xwestin hin amadekariya bikin jî ji bo gel biçe daşîrê bi saetan li benda hev diman û ava ku ji daşîrê derdikeve diherike qada ku gel lê dimîne û ev yek jî dibe sedema bînek genî li qaê belav bibe.
