Şirnex- Halîl û Emîne Oget ên hevjînên hev li gel temenê xwe yê mezin jî bi çandiniyê debara mala xwe dikin û ji ber ku sebzeyên wan erzan tên firotin bi gazinc in.
Roj bi ser re nabore ku buhaya jiyanê giran nebe, bi taybetî jî buhaya fêkî û sebzeyan. Li deverên ku çandinî lê tê kirin cotkar nikarin fêkî û sebzeyên xwe bi buhayek baş bifiroşin û ji ber vê yekê bi gazinc in. Li bazara buhaya fêkî û sebzeyan gelekî zêde ye. Li navçeya Silopya ya Şirnex welatiyê bi navê Halîl Oget (65) û hevjîna wî Emîne Oget (54) li gel temenê xwe yê zêde çandiniyê dikin û hewl didin debara xwe bi çandiniyê berdewam bikin.
Beriya roj hilê diçin nav bîstanê xwe
Halîl û Emîne Oget serê sibê saet di 04.30an ji mala xwe ya taxa Ofîsê derdikevin û bi meşê diçin zeviya xwe ya çandiniyê ku îcar girtine. Halîl Oget li ser kar û barê xwe axivî û diyar ku wan meha adarê dest bi çandina şitlên xwe kirine û wiha axivî; “10 roj ji bo meha adarê mayî min dest bi çandina şitlên xwe kir. Piştî 20 roj şûnde gijlokê lê kir û hemû şitlên min zerar dîtin. Piştî şitlên min zerar dîtîn min carek din şitlên xwe çandin.”
Hemû cureyê sebzeyan çandine
Halîl û Emîne Oget da zanîn ku hema bêje hemû cureyên sebzeyan din av bîstanê xwe de çandiye û wiha pêde çû; “ Niha sebzeyên min hema bêje hemû hatine çinîn. Min di bîstanê xwe de firingî, îsot, bacanên reş, xiyar, kulind, zebeş, petîx, bamya, xiyarên tirşiyê çandine. Îsal firingiyên min baş çê nebûn lê dîsa jî kêm be jî hîlberînek heye. Em niha kîloya firingî û xiyaran bi 20 tl difiroşin. Kîloya îsot û bacanê reş jî bi 10-15 tl difiroşin. Bi rastî jî pereyek bê qîmet e.”
Ji me erzan dikirn û buha difiroşin
Emîne û Halîl Oget jî weke hemû cotyaran anî ziman ku keda wan û buhayê fekî û zebzeyan erzan e û gotin: “Serê sibê em zû tên berhemên xwe diçinin û piranî jî dane êvarî avdaniyê dikin. Ji bo sebzeyan avdaniyê dane êvarî bi feydetir e. Bi rastî keda em didin gelek e lê pereyê em distînin hindik e. Sebzeyên ku em dibin didin dikandaran bi pereyek hindik ji dest me digirin û heman tiştan bi 2-3 qat difiroşin. Lê dîsa jî ji bo debara xwe em çandiniya xwe dikin.”
