Şirnex– Di 9ê Tîrmehê de piştî 26 salan cara ewil dîmenên Rêberê Gelê Kurd Abdullah Ocalan hat nişandan. Welatiyên Şirnex diyar kirin ku bi temaşekerina dîmenan ew gelek kêfxweş bûn. Welatî Emîne Akil anî ziman ku ew pîr e, lê bi temaşekirina dîmen ciwan bûye.
Rêberê Gelê Kurd Abdullah Ocalan duh di çarçoveya “Pêvajoya Aştî û Civaka Demokratîk” de bangeke din a dîrokî kir. Di banga bidîmen de Girtiyên li Girtîgeha Girtî ya Ewlehiya Bilind a Tîpa F ya Îmraliyê jî li cem Abdullah Ocalan cih girtin. Dîmenê Rêberê Gelê Kurd Abdullah Ocalan piştî 26 salan cara ewil hate weşandin. Ev dîmen li tevahiya cîhanê belav bû û bû rojeva Tirkiyeyê û Kurdistanê ya sereke. Welatiyên li Şirnexê dijîn hest û nêrînên xwe yên derbarê dîmenê Ocalan de anîn ziman.
‘Weke ku cardin sax bin kêfa min hat’
Welatiya bi navê Emîne Akil diyar kir ku dema wê dîmenên Abdullah Ocalan temaşe kir gelekî kêfxweş bû û wiha axivî: “Ez kal bûme. Piştî min ev dîmen temaşe kir, ez ciwan bûm. Heya niha mizgîniya herî mezin ji bo min ev bû. Weka ku ez mirî bûm û cardin sax bim wiha kêfa min hat.”
‘Hêsir bi çavên min ketin’
Halîme Yilmaz ku temenê wê zêdetirî 70 salî ye anî ziman dema dîmen temaşe kirine hêsir bi çavên wê ketine û ev tişt bi lêv kirin: “Dema min temaşe kir rondik ji çavên min hatin xwarê. Min ji xwe re got mala minê Serokê me çiqas kal bûye. Ji Xwedê re dûa dikim neyarên me bidest bike. Bila êdî dewlet gav biavêje.”
Di nava tarîtiyê de ronahiyeke
Şerîf Gungen jî got ku weke ku ev dîmen di nava tarîtiyê de weke ronehiyekî bû û wiha pêde çû: “Vaye 26 sal in Serokatî di bin tecrîdê de ye. Dema ev dîmen derketin weke ku mirov roniyekî bibîne. Weke gelê Kurd gelekî kêfa me hat, bi pêvajoyê jî em bawer in, ji ber ku baweriya me bi rêxistina me heye. Em li bendê ku ji aliyê hiqûqî ve dewlet jî gavên girîng biavêje.”
‘Bila êdî gavên çareseriyê bên avêtin’
Ayfer Yilmaz da zanîn ku dema wê dîmen temaşe kirine hîsek gelek xweş ketiye hundirê wê û wiha axivî: “Dema min dîmen dîtin kêfa min gelekî xweş bû. Êdî pêvajoyek heye û hêvî dikin gavên çareseriyê werin avêtin û êdî gelê Kurd jî şiyar bibe.”
