Amed – Xizmên windayan Îffet Muhtaş û Qiymet Zengîn anîn ziman ji bo winda bên dîtin û kujer bên darizandin her hefte ba û bager be tên qada Koşuyolu û edaletê dixwazin. Xizmên windayan destnîşan kirin ku tevî her tiştî dîsa aştiya bi rûmet, edalet heq û hiqûqê dixwazin.
Banga Rêberê Gelê Kurd Abdullah Ocalan a bi dîmen ku di 19ê Hezîranê de kiribû, di 9ê Tîrmehê de bi raya giştî re hat parvekirin. Vê bangê li cîhanê deng veda. Li ser vê bangê Koma Aştî û Civaka Demokratîk ku pêşengiya wê Hevseroka KCKê Besê Hozat kir, li pêş çapemeniya cîhanê merasima çek îmhakirinê pêk anî. Li ser vê bangê û merasima çekîmhakirinê, xizmên windayan axivîn.
Xwişka Elî Tekdag Îffet Muhtaş bi gotina “Ez diherim ser rêya Farqînê û diqîrim û diqîrm. Dibêjm Elî Elî birayê min, ez we nabînim, lê hûn min dibînin. Lê dîsa jî em aştiyê dixwazin. Em naxwazin xwîna tu kesî birije” hestê xwe anî ziman û xwest êdî hestiyê windayan bên dîtin. Xwişka Elî û Mehmet Tekdag Îffet Muhtaş anî ziman ku ew hestiyên xizmên xwe dixwazin û dixwazin goreke ku li ser fatîhayê bixwînin hebe û wiha got: “Em aştiyê dixwazin. Em naxwazin xwîna tu kesî birije. Em hestiyên windayan dixwazin. Em dixwazin gorek wan hebe. Em jî wekî edeta dinyayê biçin ser gora wan fatîhayekê û yasînekê bixwînin. Wekî din em teştekî naxwazin. Em tişteki pir mezin naxwazin. Em gorên wan dixwazin. Em aştiyê dixwazin. Dema em tên qada çalakiyê wekî em bên ser gora windayên xwe. Ba û baran be, cejn û rojî be em tên vir. Êdî bes e. Bila ji niha û şûnde xwîn nerije. Em tiştekî pir mezin ji wan naxwazin.”
‘Divê aqûbeta windayan ronî bikin’
Îffet Muhtaş anî ziman ku bi banga Rêberê Gelê Kurd Abdullah Ocalan û merasima PKKê pir kêfa wê hat, lê dixwazin ku aqûbeta van windayan jî bê ronîkirin û got: “Kengî winda hatin dîtin em ê vir terk bikin. Heta winda neyên dîtin em ê vir terk nekin.”
‘Em heq û hiqûqê dixwazin’
Xwişka Fehmî Tosun Qiymet Zengîn jî anî ziman ku gerîla li pêş hemû cîhanê çek şewitandin û wiha got: “Em niha li heviya dewletê ne ku gavan bavêje. Tişta ku dikeve ser milê dewletê dê bi dirûstî bikin an na? Em aştiyek bi edalet dixwazin. Em hesabê windayan ji dewletê dipirisin û dixwazin hesab bê pirsîn. Em heq û hiqûqê dixwazin. Êdî dora Tirkiyeyê ye. Ji ber vê yekê divê bi Kurdan re aştiyek bi rûmet çekin. Bila aştiyek bi duristî, heq û hiquqê çekin. Aştî bê jî em ê şopdarê windayan bin. Ji ber ku bi destê dewletê ev kes hatine windakirin. Biryara înfaza van însanan li meclisê hatiye dayîn. Niha ku ev mesele bê meclisê divê rastiya windayan jî bînin rojevê. Em edalet, heq, hiqûq û aştiyek bi rûmet dixwazin.”
