Siyasetmedara Kurd Tara Hisên destnîşan kir ku mafên Gelê Kurd neyê dayîn, dê carek din şoreşa çekdarî destpê bike û wiha axivî: “Bingeha serkeftina pêvajoyê azadiya fizikî ya Rêber Apo ye. Jin di sedsala 21an de pêşengtiya guhertinan dikin.”
Siyasetmedara Kurd Tara Hisên derbarê pêngavên dîrokî yên Rêberê Gelê Kurd Abdullah Ocalan de ji Ajansa ROJNEWSê re axivî. Tara Hisên ewil balkêşa ser pêngava dîrokî ya gerîlayên azadiyê ya şewitandina çekan û got; “Ji bo gelê Kurd û herêmê rojek dîrokî bû, me dît bi îradeyek azad Rêber Apo û Tevgera Azadiya Kurdan ji bo çareseriya pirsa Kurd pêngav avêtin. Eger hêza siyasetê nebe, hêza aştiyê jî nabe, Rêber Apo bi tevger, gel û paradîgmaya xwe hêzek mezin a siyasî ye. Ji bo vê dest bi mijarek wiha kir. Ev pêngava Rêber Apo ji hêzbûna wî tê. Ne ji lewaziyê ye. Dewletê xwest bi dîlgirtina Rêber Apo têkoşîna Kurdan ji holê rake. Lê bê encam ma. Ji bo vê Rêber Apo di girtîgehê de Kurd xistin rojeva cîhanê. Lidarxistina merasîmek wiha ya gerîla, encama hêza Rêber Apo û tevgera wî bû.”
Tara Hisên derbarê pêngavên ji bo pêvajoya aştiyê de jî got; “Siyaset valehiyê qebûl nake. Lewma eger mafên gelê Kurd neyê dayîn, wê carek din şoreşa çekdarî destpê bike. Erdogan zimanê xwe neguhertiye. Ev jî xizmeta rewşê nake. Me li axaftina Erdogan guhdar kir. Ev serkeftina fikir û paradîgmaya Rêber Apo ye. Pêwîste dewleta Tirk tenê di çarçoveya axaftinan de nemîne, di pratîkê de tiştekê bike. Pêngava herî nêzîk jî avakirina komisyona li parlamentoyê û azadkirina fizikî ya Rêber Apo ye.”
Siyasetmedara Kurd Tara Hisên herî dawî got; “Ev pêngava dîrokî ya gerîla, cihê kêfxweşiyê bû. Jinan pêşengtî jêre kir. Fermandar jî Besê Hozat bû. Ev xwedî wateyek girîng e. Tevî wê jî sedeya 21an, sedsala jinan e. Di vê sedsalê de jin pêşengtiya guhertinan dikin. Ev jî bicihanîna paradîgmaya Rêber Ocalane. Jin dikarin pêşengtiya aştiyê bikin. Azadiya fizikî ya Rêber Apo, bingeha serekftina pêvajoya aştiyê ye.”
