Li gelek bajarên Kurdistan û Tirkiyeyê bi wesîleya salvegera Berxwedana 14ê Tîrmehê merasîmên bîranînê hatin lidarxistin.
Di salvegera 43emîn a “Rojiya Mirinê ya Mezin” a ku bi pêşengiya Kemal Pîr, Hayrî Durmuş, Akîf Yilmaz û Alî Çîçek dest pê kiribû, li bajarên Kurdistanê û Tirkiyeyê merasîmên bibîranînê hatin lidarxistin.
Wan
Şaxa MEBYA-DERê ya Wanê, Komeleya Yekitî, Çand, Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER) ya Wanê, bi hevkariya Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) ji bo bîranîna berxwedêrên 14ê Tîrmehê Mehmet Hayrî Dûrmûş, Kemal Pîr, Akîf Yilmaz û Alî Çîçek li eywana ŞanoWanê merasîma bîranînê pêk anî. Di eywana merasîmê de pankarta ku wêneyên Rêberê Gelê Kurd Abdullah Ocalan û her 4 pêşengên berxwedana 14ê Tîrmehê û nivîsa “bi rihê berxwedana 14 tîrmehê ber bi civaka demokratîk û aştiyane” li ser bû, hat daliqandin. Di merasîmê de dirûşmên “Şehîd namirin” û “bijî serok apo” hatin berzkirin. Endam û rêveberên partiyên siyasî û gelek kes tev li merasîmê bûn.
Di merasîmê de ewilî Hevseroka MEBYA-DERê Hanim Kaya axivî û bal kişand ser berxwedana 14ê Tîrmehê. Hanim Kaya da zanîn ku ew dê li pey şopa wan berxwedêran bin û ew ê hewl bidin bibin layiqê doza wan. Piştî axaftina Hanim Kaya nirxandina Rêberê Gelê Kurd Abdullah Ocalan ya derbarê 14ê Tîrmehê de hat guhdarîkirin.
‘Pêvajoyê erkên me giran kiriye’
Dûre Cahît Tamûr ku 30 salan di girtîgehê de maye, mafê axaftinê hilgirt û berxwedêrên 14ê Tîrmehê bi bîr anî. Cahît Tamûr, bal kişand ser pêvajoya nû û anî ziman ku tişta pêwîst fêmkirina vê pêvajoyê ye û got: “Serokatî dibêje ku ev ne dawî ye, destpêkeke nû ye. Ji bo vê destpêka nû em deyndarên berxwedêrên 14ê Tîrmehê ne. Mazlûm, Ferhat, Kemal hwd. di dîroka tevgera me de pir girîng in. Îro pêvajoyek destpêkiriye û vê pêvajoyê erkên me giran kiriye. Li hember van pakrevanan em pir kêm û qels mane, lewma divê em paradîgmaya Serokatî bixin meriyetê.”
Piştî axaftinan merasîm bi dawî bû.
Îzmîr
Tevgera Jinên Azad (TJA) û Komeleya Alîkarî û Piştgiriyê (ANYAKAYDER), ji bo kesên di rojiya mirinê de şehîd bûne û Zeynep Kinaci (Zîlan) li avahiya DEM Partiyê merasîma bîranînê li dar xistin. Di bernameyê de sînevîzyon hate pêşandan û welatiyan li ser wateya rojê axaftin kirin.
Riha
Ji aliyê DEM Partî, DBP û Însiyatîfa 78an a Rihayê ve li avahiya navçeya Haliliyeyê panelek hate lidarxistin. Xwişka berxwedêrê rojiya mirinê Alî Çîçek, Ayşe Çîçek û Hevberdevka Komîsyona Hiqûqê ya DEM Partiyê Sevda Çelîk Ozbîngol jî beşdarî panelê bûn. Panel bi rêzgirtinê destpê kir û bênavber dirûşmeyên “Bijî Serok Apo” û “Bijî berxwedana zindanan” hatin berzkirin. Şukru Bînîcî li ser girîngiya dîroka 14ê Tîrmehê û banga dawî ya Rêber Apo axivî.
Mêrsîn
Li avahiya DEM Partiyê panelek hate lidarxistin. Yek ji şahîdê rojiya mirinê Ganî Alkan di panelê de axivî. Alkan diyar kir ku Girtîgeha Amedê ji bo gelê Kurd bûye sembola berxwedanê û got: “Rojiya Mirinê ya Mezin, nîşana herî berbiçav e ku gelê me nayê teslîmgirtin.” Endama Meclisa Ciwanan Nur Uykur jî anî ziman ku mîrateya Kemal Pîr îro di têkoşîna ciwanan û jinan de berdewam dike. Panel bi pêşandana sînevîzyonê û bi strana hunermend Kadîr Çat a bi navê “Kemal Pîr Yoldaş” bi dawî bû.
Edene
Komeleya Alîkarî û Piştgiriyê ya Malbatên Xizmên Xwe Windakirin ên Deryaya Spî (AKKAYDER) û DEM Partî bi hev re merasîma bîranînê li dar xistin. Di merasîmê de sînevîzyona ku behsa Rojiya Mirinê ya Mezin dike hate pêşandan.
Colemêrg
DBP, DEM Partî û TJ’yê li Colemêrgê bîranîn li dar xistin. Bîranîn bi rêzgirtina ji bo kesên di têkoşîna demokrasî û azadiyê de jiyana xwe ji dest dane dest pê kir. Endama MYK’ê ya DBP’ê Ayşe Çelîlbîlek di axaftina xwe de bal kişand ser wateya dîroka 14ê Tîrmehê ya ji bo gelê kurd û destnîşan kir ku têkoşîn li ser xeta Rêber Apo didome. Bîranîn bi pêşandana sînevîzyonê bi dawî bû.
