Ji ber deynên di dema qeyûm de mane û nehatine dayîn, dest danîn ser amûr û eşyayên Şaredariya Rêya Armûşê.
Şirketek ku di dema qeyûm de ji şaredariyê îhaleyek wergirt lê pereyê xwe negirt, li dijî Şaredariya Rêya Armûşê ya Wanê doz vekir. Karmendên sepandinê hatin şaredariyê û kursî, amûr, komputer û hemû tiştên din ên bi nirxê pereyan ji qata hevşaredariyê desteser kirin. Xebatkarên şaredariyê li hember desteserkirinê bi hêrs bertek nîşan dan.
‘Çima wê demê ev deyn nehatin berhevkirin?’
Cîgirê Şaredar Cuneyt Ergun, bertek nîşanî desteserkirina amûr û eşyayên şaredariyê da û diyar kir ku ev kiryar neqanûnî ye. Cuneyt Ergun, da zanîn ku şaredarî di dema qeyûm de 13 milyon Lîreyan deyndarê şîrketê bû û ev deyn gihîştiye 15 milyon Lîreyan. Cuneyt Ergun, destnîşan kir ku xerc û deynên di dema qeyûm de çêbûne rêveberiya heyî xistiye rewşek dijwar û pirsî, “Çima wê demê ev deyn nehatin berhevkirin?”
Di nava şaredariyên herî deyndar de ye
Şaredariya Rêya Armûşê ku du caran qeyûm lê hatiye tayînkirin, di nav şaredariyên herî deyndar ên Tirkiyeyê de ye.Rêveberiya DEM şaredarî ji qeyûm bi deynek 1,123,645,200 lîre û 31 quruş wergirt. Ji ber ku deynên rojane kom dibin, şaredarî tenê dikare bi pereyên ku distîne mûçeyên xebatkaranbide. Ji ber deynên ji dema qeyûm şaredarî bi gefadesteserkirinê re rû bi rû ye û hemû serlêdanên şaredariyê yên ji bo ji nû ve sazkirina deynan an jî paşxistina deynan bêencam mane.
