Helebce – Li Herêma Hewreman ku dikeve navbera başûr û rojhilatê Kurdistanê coka avê sînor diyar dike. Coka avê diyar dike ku bê ka netew dewletan çawa sînorê Kurdistanê ji hev veqetandin e.
Li gundê Biyare ya bi ser bajarê Helebceyê ve çîrokek ku bala hemû Kurdan bikişîne heye. Gundê Biyarê di heman demê de yek ji gundê Herêma Hewreman e û 30 kîlometre dûrî Helebce ye. Ev gundê ku cihê geştiyariyê û seyranê ye li ser xeta sînorê başûrê Kurdistanê û rojhilatê Kurdistanê ye. Li jora gund ku cihê seyranê ye co ango cihoka avê sînorê başûr û rojhilatê Kurdistanê ji hev vediqetîne. Dema mirov ji hêla Başûr ve gava xwe diavêjin aliyê din ew der dibe Rojhilat dema ji wir gava xwe diavêjin aliyê din ew der dibe Başûr.
Ji vê coka avê jî diyar dibe ku bê ka netew dewletan erdnîgariya Kurdistanê ji hev veqetandin e. Ev sînorê sûnî ku hatiye çêkirin wekî gelek xalên din ên Kurdistanê ji hev qut kiriye.
Ev cihoka avê bi kîlometreyan dirêj e sînorê her du aliyên Kurdistanê diyar dike. Gelek welatî ji bo geştiyarên tên û serdana gundê Biyarê dikin. Tevî ku ziman, çand û hemû bîr û baweriya Herêma Hewraman yek e jî lê xelkê Kurd bi sînoran ji hev hatiye veqetandin.
‘Ev sînor dewletan çêkiriye’
Edîtorê RojNewsê û rojnameger Botan Germiyanî li ser sînorê ku Kurdên deverê ji hev qut kiriye axivî û bal kişand ser bêwatebûna sînorê navbera başûr û rojhilatê Kurdistanê.
Botan Germiyanî diyar kir ku wekî ku xuya dike jixwe sînorek jî nîn e û got: “Ev der herêmek e. Niha tu li ser axa başûrê Kurdistanê ye, ez jî li ser axa rojhilatê Kurdistanê me. Ev sînorek sembolîk e ku dewletan ev sînor çêkiriye. Ev herêma xwedîdewlemend ji hev hatiye qutkirin. Ziman, çand, cil û berg yek, heta mirovên hev in. Ax yek e, herêm yek e her du alî Kurdistan in. Di xeyala kesî de ev sînor nîn e, lê dewletan ev sînor çêkiriye.”
