Amed – Rêveberê Komeleya MED-DERê Mazhar Aktaş diyar kir ku wan ji bo atolyeyên axaftinê dest bi xebatan kiriye û got: “Serlêdanên qeyda atolyeyên me yên axaftinê hêj berdewam dikin, dê heta sê çar rojan bidomin. Pişt re em ê dest bi atoleyeyan bikin.”
Komeleya Lêkolînê ya Ziman û Çandên Mezopotamyayê (MED-DER) li Amedê ji 2017yan heta niha bênevber dersên zaravayên Kurmancî û Kirmanckî dide. Komeleyê ji bo atolyeyên axaftinê jî li avahiya komeleyê dest bi qeydan kir. Atolyeyên ku wê li saziyê bên lidarsixtin, tenê dê ji bo kesên axaftina wan qels e were lidarxistin. Heta niha ji bo dersê nêzîkî 15-16 kesan serlêdan kirine. Dê ev atolyeya axaftinê 45 rojan bidome. Kesên ku serlêdan kirine, piraniya wan şagirtên zanîngehê ne. Herwiha ev atolye bi tenê ji zaravayê Kurmancî pêk tê. Rêveberê Komeleyê Mazhar Aktaş, di derheqê agahiyên derbarê qeydên atolyeya axaftinê de, ji Ajansa Welat re axivî.
Mazhar Aktaş, diyar kir ku armanca wan li her derê axaftina Kurdî ye û wiha got: “Qeydên atolyeyên me yên axaftinê hêj berdewam dikin û dê sê çar rojan bidomin. Piştre em ê dest bi atolyeyê bikin. Dê ev atolye hefteyê rojekê be û dê 45 hefteyan berdewam bikin. Di vê qadê de ev tişteke nû ye. Lewre zimanê me ji hemû kodên xwe ve hetiye guhertin û di bin bandora zimanê serdest de maye. Hemû kesên bi zimanê Kurdî re eleqedar dibin dîsa di bin bandora zimanê serdest de dimînin. Em dixwazin reseniya vî zimanî derxin holê. Ji ber vê yekê me pêwîstî bi atolyeyê dît. Serlêdan jî hene. Di gelek beşên civakê de siyasetmedar, bijîşk, parêzer û xwendekar in, dixwazin zimanê xwe li pêş bixin, pratîze bikin, û di bin bandora zimanê serdest derxin. Reseniya vî zimanî em diparêzin.”
‘Bi dildarî vî karî dikin’
Mazhar Aktaş anî zîman ku ew jî bo ziman bi dildarî xebatên xwe didin meşandin û wiha berdewam kir: “Em ne ji bo berjewendiyê li saziyê ne. Heta ji me bê, em ê xizmeta zimanê Kurdî bikin. Di vê atolyeyê de bi tenê zaravayê Kurmancî heye. Heta niha nêzikî 15-16 kesan ji bo atolyeyê serî li me daye. Hinek kes jî agahî dane û ji bo serlêdanê hê jî nehatine. Em dibêjin dê hejmara şagirtan derkeve ser 20an jî. Bi tenê 15 kes bin jî em ê dîsa dersa xwe bidin. Weke ku me plansaziya xwe kiriye, em ê atolyeya xwe bidomînin.”
‘Peyvên şaş dikevin nava ziman’
Mazhar Aktaş di dawiya axaftina xwe de bal kişand ser kêmasiyên rastnivîsa çapemeniyê û wiha axivî: “Bangewaziya me bi taybet ji bo çapemeniyê ye, carna gelek peyvên şaş dikevin nava ziman û ev peyvên şaş weke rast têne belavkirin. Ev me diêşîne û pêşiya wan neyê girtin. Dema ku şaşî bê belavkirin, rastkirina wê gelek zehmet e. Pêşiyê mirov karibe şaşiyên xwe sererast bike, dê gelek baş be. Em bi vî awayî bang dikin û bi taybet jî xebatkarên çapemeniyê beşdar bibin, em ê bêhtir pê keyfxweş bibin.”
