Şirnex – Veysî Dûrmûş ku 27 sal in li gelek bajarên Kurdistanê mêşvaniyê dike, bal kişand ser polîtîkaya dewletê ya hawirdekirina hingivê Îranê û got ji ber vê yekê û hingivê sexte êdî ew nikarin karê xwe bikin.
Li Kurdistan û Tirkiyeyê kesên ku bi keda destê xwe dixwazin debara xwe bikin ji ber polîtîkayên dewletê yên şaş nikarin ji karê xwe qezenc bikin. Veysî Dûrmûş ê ku 27 sal in li gelek bajarên Bakurê Kurdistanê û Tirkiyeyê mêşvaniyê dike, ji ajansa me re behsa mêşan, mêşvaniyê û rewşa mêşvanên herêmê kir.
‘Divê ji bo nexweşiyan mêş her tim werin kontrolkirin’
Dûrmûş li ser girîngiya xwedîkirina mêşan da zanîn divê li gor pêwîstiya mêşê kontrolkirin hebe û wiha got: “Li gor pêwîstiya mêşê em kontrola mêşan dikin. Em lê dinêrin ka mîr heye tuneye, an jî mak heye, tuneye. Dîsa em lê dinêrin ka nexweşiyek di nava mêşê de heye. Ger kêmaniya mîr an jî makê hebe, em tînin têxin nava mêşê. Dema tu zerarê nedî mêşan êrişî te nake.”
Dûrmûş diyar kir ku mêş 21 rojan carekî ferxikên xwe çêdikin û axaftina xwe wiha domand: “Di her sindoqekî de mîrek heye û li gor mêşan û çêkirina hingîvê wan em qatan diavêjin ser. Dema anîna hingiv zêde dibe em li gor wê petekan zêde dikin. Dema mêşên nêr di sindoqan de zêde dibin, mêşên din tenê mîrekî dihêlin nava xwe de û yên din dikujin. 21 rojan carekî ferxikên mêşan derdikevin û mêş zêde dibin.”
‘Polenan ji bo nexweşiyan hiltînim’
Dûrmûş anî ziman ku ew carna polenên mêşan ji bo nexweşiyan radikin û got: “Dema mêş li ser kulîlkan digere toza kûlîlkan têxe nava çengên xwe û ji bo xwedîkirina mîr tîne nava sindoqê. Ev barê mêş datîne ser milê xwe û tîne, carna ez radikim û ji bo gelek nexweşiyan bikartînim. Ji bo zikêşê û pêşketine hestiyên zarokan baş e û jêre polen tê gotin.”
‘Ez mêşvanekî gerok im’
Dûrmûş da zanîn ku mêş ku deverê bixwaze ew berê xwe dide wê herêmê ev gotin li axaftina xwe zêde kirin: “Vaye 27 sal in ez mêşvaniyê dikim. Ez mêşvanekî gerok im. Mêş ku derê bixwaze ez diçim wir. Ez li bajarên Tirkiyeyê weke Mûxla, Mêrsîn û Edeneyê geriya me û min mêşvanî kiriye. Weke din li Kurdistanê jî li bajarên Amed, Cizîr, Silopiya, Geverê û Elkê digerim û mêşvaniyê dikim.”
‘Dewlet destûrê dide hingivê Îranê û em zararê dikin’
Dûrmûş herî dawî rexne li polîtîkaya dewletê ya ji bo mêşvanan û Saziya Mêşvanên Şirnexê kir û axaftina xwe wiha bi dawî kir; “Di salên dawî de hingîvê glîkozê derketiye û ji ber hingiviyê sexte niha jî hingivê mêşên me pere nakin. Gel ji hingivê baş fêm nake û ji ber vê yekê hingivê sexte dikire. Ji ber ku dewlet jî destûrê dide ji Îranê hingiv were herêmê êdî di karê me de feyde nemaye û em gelekî zehmetiyê dikêşînin. Li vir Saziya Mêşvanên Şirnexê heye. Hemû mêşvanên herêma Şirnexê endamên vê saziyê ne lê tu feydeyê vê saziyê nagihîje me. Ne alîkariyekî didin me, ne jî hingivê me dikirin. Dema hingivê me dikirin jî bi buhayek gelek erzan dikirin û ev yek jî zerarê dide me.”
