Meclîsa Dayîkên Aştiyê ya Amedê li avahiya ÎHDê ya Amedê daxuyanî dan û diyar kirin ku dê ji bo bi Rêberê Gelê Kurd Abdullah Ocalan re hevdîtin bikin serî li Wezareta Dadê bidin.
Meclîsa Dayîkên Aştiyê têkildarî pêvajoya ‘Aştî û Civaka Demokratîk’ li Şaxa Komeleya Mafên Mirovan (ÎHD) a Amedê ya daxuyanî dan çapemeniyê. Dayikan di daxuyaniyê de anîn ziman ku ew dixwazin bi Rêberê Gelê Kurd Abdullah Ocalan re hevdîtin bikin.
‘Em dixwazin bi Abdullah Ocalan re hevdîtin bikin’
Endama Meclîsa Dayîkên Aştiyê Havva Kiran li ser navê Dayîkên Aşityê axivî û got: “Ev şeş meh in pêvajoyeke aştiyê dimeşe. Weke Dayikên Aştiyê, em dixwazin bi Birêz Ocalan re hevdîtinê bikin. 26 sal in, me ji her kesê ku di vê pêvajoyê de aştî xwestiye piştgirî daye. Em spasiya her kesê ku beşdarî vê pêvajoyê bûne dikin. Wekî Dayikên Aştiyê, em dixwazin piştrast bikin ku em ê bi Birêz Abdullah Ocalan re hevdîtinê bikin. Ev mafê dayikan ê herî rewa ye. Ji ber ku zarokên wan ji bo vê dozê şer kirin. Em bang li dewletê dikin, eger pêvajoyek dest pê kiribe, bila balafirên şer bêdeng bikin. Em dixwazin aştiyeke mayînde bê Rojhilata Navîn û tevahiya cîhanê. Em ne tenê ji bo xwe, ji bo gelê Filistînê jî aştiyê dixwazin. Ew jî di şert û mercên pir dijwar de dijîn. Em dixwazin bibin beşek ji vê pêvajoyê. Em ji hêzên navneteweyî û dewleta Tirkiyeyê dixwazin ku aştiyê bînin. Bila em li vir li Tirkiyeyê, di ax, av û xwezaya xwe de, ku wekî zêr biqîmet e, bi aştiyê bijîn. Bila gelê Kurd û Tirk bi aştiyê bijîn. Em daxwaza xwe ya ji bo hevdîtinê bi Birêz Ocalan re dubare dikin.”
Daxuyanî bi pirs û bersîvan bidawî bû.
