Colemêrg – Li Nexweşxaneya Geverê ya Colemêrgê ji ber ku cîhazê pergala înternetê ya nexweşxaneyê xera bûye, bijîşk nikarin li nexweşan binêrin.
Li Nexweşxaneya Gever a Colemêrgê ji ber ku cîhazê pergala înternetê xera bûye, bijîşk nikarin li nexweşan binêrin. Hat zanîn ku ji roja duşemê ve li Nexweşxaneya Dewletê ya Geverê pergala înternetê naxebite û her deh deqîqeyan carekê xwegihandina pergala nexweşxaneyê qût dibe. Welatiyên ku diçin nexweşxaneyê mexdûr dibin û bi saetan bendê dimînin. Hat hînbûn ku gelek nexweş, ji roja duşemê heta îro nekarîne xwe nîşanî bijîşk bidin û ev 4 rojin li ser hev diçin nexweşxaneyê.
Welatiyên ku rewş ji bo me vegotî, dan zanîn ku ev 4 roj in gelê Geverê mexdûriyeteke mezin dijî û li ber deriyê polîklînîkan girseyeke mezin heye. Welatiyan anî ziman ku tevî gilîkirinê jî Miduriyeta Tendûristiyê ya Colemêrgê ku girêdayî Wezareta Tendûristiyê ye, cîhazê pergala înternetê çênekiriye û mexdûriyeta Geveriyan hêj jî didome. Her wiha welatiyan bang li rayedaran kir û xwestin ev pirsgirêk demildest çareser bibe.
