Şirnex – Taybet Înan ku di qexeyên derketina dervê ya navçeya Silopiyayê de hatibû qetilkirin û cenaze wê heft rojan li kolanê mabû li cihê ku lê hat qetilkirin ji aliyê malbata wê û gelek kesan ve hat bibîranîn.
Taybet Înan (55) ku di 19ê Kanûna 2015an de di qedexeya derketina dervê ya Silopiya de hatibû qetilkirin û cenazeyê wê heft rojan li kolanê mabû bi pêşengiya Tevgera Jinên Azad (TJA) û rêxistina Partiya Wekhevî û Demokrasiyê ya Gelan (DEM Parti) a Şirnexê de li taxa Nûh ku lê hatibû qetilkirin hat bibîranîn. Malbata Taybet Înan jî tev li bi bîranînê bû û di bîranînê de wêneyên Taybet Înan, qurnefîl û wêneyên kesên di dema qedexeyan de hatinê qetil kirin hat hilgirtin.
Parlamentera DEM Partiyê ya Şirnexê Newroz Uysal Aslan di bîranînê de axivî. Newroz Uysal Aslan bi lêv kir ku di şexsê Dayika Taybet Înan de mirovahî di vê kolanê de hatiyê kuştin û wiha got: “Cenazeyê wê 7 rojan û 7 şevan li vê kolanê ma. Me di vî wêneyî de hovitî dît. Dayika Taybet bû sembola vê hovitiyê. Me di Komkujiya Roboskiyê de, me di qetilkirina dayika Taybet de, me di qetilkirina Ayşe Bûrûntekîn de dît ku ev dewlet dijmintiya ax û nasnameya vî gelî dike. Ev plana ruxandinê ya ku dabû destpêkirin hêj jî didomînin. Di qetilkirina dayika Taybet de yek kujer nehate darizandin. Îro dewleta tirk xwedî li van sucan derdikeve û diparêze. Lê em van sûcan qebûl nakin û ji bîr jî nakin. Heta ku kujer hesab bidin em ê têbikoşin. Dilê me îro bi êş e. Lê em dizanin bi qetilkirina dayika Taybet nekarîn bi gelê kurd çok bidin danîn. Heta ku hesab bê dayîn wê tekoşîna me bidome.”
Piştî axaftinan beşdarvan qûrnefîl li cihe ku Taybet Înan lê hatibû qetilkirin danîn û dirûşmeyên “Şehîd namirin” berz kirin.
Piştî daxuyaniyê girse derbazî mala Taybet Înan bû ji malbatê re sersaxî xwestin. Malbatê jî ji bo sersaxiyê spasiya girseyê kirin. Piştrê jî girsê bi dorê serdana malbata Hasan Sanir (Mele Hesen) û Ayşe Buruntekîn ên di qedexeyên derketina dervê de hatibûn qetilkirin kirin û ji malbatan re ser saxî xwestin.
