MED-TUHAD-FED, TUAY-DER û Şaxa OHDa Amedê têkildarî gefa ku li girtiya bi navê Semra Akgul a li Girtîgeha Jinan a Amedê girtî ye hatibû xwarin, li ber girtîgehê daxuyanî dan û nerazîbûn nîşanî gefxwarinê dan.
Federasyona Komeleyên Hiqûqî û Hevgirtinê yên Malbatên Girtî û Hikûmxwaran a Medê (MED-TUHAD-FED), Komeleya Alîkarî û Hevgirtina bi Malbatên Girtî û Hikûmxwaran re (TUHAY-DER) û Komeleya Mafên Mirovan (ÎHD) a Şaxa Amedê û Komeleya Hiqûqnasên Ji Bo Azadiyê (OHD) a Şaxa Amedê têkildarî gefa ku li girtiya bi navê Semra Akgul hatibûn xwarin, li pêşiya Kampûsa Girtîgeha Amedê daxuyanî dan çapemeniyê. Rêveber û nûnerên rêxistinên sivîl û partiyên siyasî, hevşaredar û gelek kes beşdarî daxuyaniyê bûn.
Beriya daxuyanî bê dayîn ewilî Hevserokê OHDa Amedê Muhîttîn Mûgûç axivî û da zanîn ku di pêvajoya “Aştî û Civaka Demokratîk” de kêm be jî li hin girtîgehan rewş baş bûye lê belê li girtîgehên Amedê, Xarpêt û Sîncanê li dijî girtiyan liv û tevgerên provokatîf pêk tên.
Metna daxuyaniyê ji aliye Hevseroka TUAY-DERê Yeter Erel ve hat xwendin. Yeter Erel diyar kir ku mînaka polîtîkayên îşkenceyê ya herî berbiçav li Girtîgeha Jinan a Amedê xwe di şexsê girtiya bi navê Semra Akgul de xwe nîşan da. Yeter Erel da zanîn ku Semra Akgul piştî emeliyat dibe li nexweşxaneyê bi gefa cendirmeyan re rû bi rû dimîne û got ku ev yek pirr eşkere hem di nav girtiyan de hem jî li îdareya girtîgehê fikarên cidî çêkiriye. Yeter Erel anî ziman ku tenê ne li girtîgeha Amedê her wiha li girtîgehên Sîncan, Erzîngan û Xarpêtê jî mafên girtiyan tên binpêkirin û got ku ew dixwazin demildest dawî li binpêkirinên mafan û gefên li dijî girtiyan bên anîn. Yeter Erel xwest ku rê li ber van provokasyonên gardiyan û leşkerên girtîgehan bê girtin.
Piştre Parlamentera DEM Partiyê ya Amedê Adalet Kaya axivî û diyar kir ku wê li girtîgehê serdana Semra Akgul kiriye û behsa tiştên hatine serê Semra Akgul kir.
Daxuyanî bi berzkirina dirûşemyan bi dawî bû.
