Şandeya PYD û tîma Nûnerê Taybet ê NYyê li Şamê hevdîtin pêk anîn. Di hevdîtinê de anîn ziman ku ji bo avakirina welatekî azad û demokratîk divê diyaloga navxweyî bi beşdariya tevahiya aliyên siyasî bidome.
Di çarçoveya hewldanên pêşxistina diyaloga navxweyî ya sûriyeyî û piştevaniya çareseriya siyasî de, şandeyek ji Partiya Yekitiya Demokratîk (PYD), duh (15 Tebax 2025) li Şamê bi tîma Nûnerê Taybet ê NYyê yê Sûriyeyê Geir Pedersen û Rêveberê Ofîsa Komîserê Bilind ê Mafên Mirovan Ebdullezîz Ebdullezîz re hevdîtinek pêk anî.
Şandeya PYDê ji Hevseroka Nivîsgeha Têkiliyên Giştî ya PYDê Sema Begdaş û endamên rêxistina partiyê ya Şamê Mihemed Emîn û Feyrûz Xelîl pêk dihat.
Di hevdîtinê de li ser rewşa Sûriyeyê, rêbazên pêkanîna çareseriyeke siyasî ya giştî, pêşxistin têkiliyên civakî û siyasî yên Sûriyeyê, her wiha avakirina baweriyê di navbera pêkhateyên welat de nîqaş çêbû.
Endamên şandeya PYDê bal kişand ser gotinên nefret û kîndariyê ku li dijî gelê Kurd û HSDê têne kirin û diyar kirin ku divê li ber van nêzîkatiyan bê girtin.
Endamên tîma Pedersen anîn ziman ku ew gotinên nefretê red dikin, piştgiriyê didin hewldanên xurtkirina têkiliyan di navbera pêkhateyên gelê Sûriyeyê de û peymana 10ê Adarê ya di navbera serokê hikumeta veguhêz Ehmed El Şeri û Fermandarê Giştî yê HSD’ê Mazlûm Ebdî de.
Tîma nûnerê NYyê her wiha îşaret pê kir ku divê diyalogên navxweyî dewam bikin û da zanîn ku NY’yê piştgiriyê dide hewldanên avakirina Sûriyeyeke nû ya li ser esasê edalet û wekheviyê.
Di dawiya hevdîtinê de ji bo pêkanîna hêviyên gelên Sûriyeyê yên avakirina welatekî azad û demokratîk girîngiya domandina diyalogan û beşdariya tevahiya aliyên siyasî hat destnîşankirin.
