Rojnamevan Gulistan Tara û Hêro Behadîn di salvegera qetilkirina xwe de li cihê ku lê hatin qetilkirin hatin bibîranîn. Di bîranînê de soza “Em ê tu carî dest ji têkoşînê bernedin” hate dayîn.
Li Silêmaniyê bi boneya salvegera qetilkirina rojnamevanên Ragihandina Azad Gulistan Tara û Hêro Behadîn ên di encama bombebarana dewleta Tirk a li gundê Tepereş ya navçeya Seyîdsadiq jiyana xwe ji dest dan, ji aliyê hevrê, hempîşe û rojnamevanên Ragihandina Azad ve li cihê ku lê şehîd bûne, hatin bibîranîn. Beşdarên bîranînê li cihê ku her du rojnamevanên Ragihandina Azad lê hatin qetilkirin 364 mûm pêxistin û bi rêzdarî bibîr anîn.
Rojnamevan Hawrê Karwan li cihê bîranînê axaftinek kir û got: “Salek bi ser şehadeta Gulistan Tara û Hêro Behadîn re derbas bû. Wekî hevrê û hempişeyên herdu rojnamevanan, me bi boneya salvegera şehadeta wan, ew bi pêxistina 364 mûman bibîr anîn. Li vir em peyamek ji hişmendiya yekparêz dişînin ku ji bilî ya xwe hemû raman û bîrdoziyên azad red dikin; Em li virin û em şehîdên xwe bibîr tînin. Têkoşîna wan dê her û her di bîra me de bimîne.”
Hawrê Karwan wiha domand; “Me çawa ev mûm pêxistine ku ronahî û şewqê didin me, şehîdên me jî weke ronahiyê ne û tim rêya me ya têkoşînê ronî dikin. Ronahiya wan qet venamire. Em, wekî hempîşeyên wan, dê bi heman ruhê Gulistan Tara û Hêro Behadîn têkoşîna xwe bidomînin. Emê li ser tiştê ku ji bo doza rewa ya gelê Kurd li her çar parçeyên Kurdistanê pêwîste, bixebitin. Em natirsin, em li vir wek çiyayan asê ne, emê heta nefesa xwe ya dawî ji bo têkoşîna van şehîdan şerê azadiyê bikin.”
Rojnamevan Hawrê Karwan li ser pêvajoya Aştî û Civaka Demokratîk jî ec tişt anî ziman: “Pêvajoya aştiyê ku niha li bakurê Kurdistanê û Tirkiyeyê dest pê kiriye, ew berhema xwîna van şehîdan e. Bi heman awayî, li rojavayê Kurdistanê jî xwerêveberî heye. Em ê bi heman ruhê şehîdan xebatên Ragihandina Azad û têkoşîna hevkarên xwe bidomînin.”
Rojnamevan Hewar Mihemed û hevrêya Şehîd Gulistan Tara û Şehîd Hêro Behadîn jî li cihê bîranînê axaftinek kir û got; “Îro li cihê şehadeta Gulistan Tara û Hêro Behadîn, ku ji aliyê dewleta Tirk ve bi alîkariya xeta xiyanetê ya navxweyî hatin şehîdkirin, me bi vêxistina 364 mûman xwest peyama ku rêya wan ya têkoşîna azadiyê her û her berdewam dike. Her wiha rêya şehîdan ronî ye ku li ser heman armanca wan ji bo wê têkoşîn kiriye. Emê xebata Ragihandina Azad li ser bîranîna şehîdan bidomînin û têkoşîna wan heta azadiyê bidomînin.”
Bîranîn bi berzkirina dirûşmeya ‘Şehîd namirin’ bi dawî bû.
