Civaknasê Emerîkî navdar Craig Calhoun piştgirî da pêvajoya aştiyê û got: “Ji dil hêvî dikim ku yên ji bo aştiyê bi dewleta Tirkiyeyê re di nava danûstandinan de ne, dê bi ser bikevin.”
Civaknas Craig Calhoun ku bi salan e li Zanîngeha New Yorkê akademîsyenî kir, li Institute for Public Knowledgeyê rêveberî kir û li Social Science Research Councilê wezîfeya serokatiyê kir, hîn jî li Zanîngeha Eyaleta Arizonayê weke profesorê zanistên civakî wezîfeyê dike.
Craig Calhoun di peyama xwe de diyar kir ku ew piştgiriyê dide paşerojeke aştiyane ya gelê Kurd û têkoşîna wan a ji bo mafê diyarkirina çarenûsa xwe. Craig Calhoun anî ziman ku ew dixwazim bibêje, ku piştgiriyê dide her kesî yên ku di nava têkoşîna gelê Kurd de cih digirin û wiha got: “Piştgiriyê didim kesên ji bo paşerojeke aştiyane û hîn baştir û mafê diyarkirina çarenûsa xwe têdikoşe. Pê zanim ku di nava rewşeke welê de ku hêvî hate şikandin û dijminatiyeke eşkere tê kirin, dewamkirin û parastina hêviyê çiqasî zehmet e. Hurmeteke mezin didim wan mirovan ku li gel vê yekê jî hewldanên xwe dewam dikin. Bi taybetî agahî û eleqeyeke min a taybet ji bo paşeroja Kurdên li Tirkiyeyê heye. Hêvîdar im ku wê nêzîkatiyeke hurmetdar ji bo her kesên tevlî pêvajoya aştiyê bûne bê nîşandan. Ji vê jî girîngtir, ji dil hêvî dikim ku ku yên ji bo aştiyê bi dewleta Tirkiyeyê re di nava danûstandinan de ne, wê bi ser bikevin.”
