Nûnerên Bakur û Rojhilatê Sûriyeyê bi mijara kêmkirina rageşiya li Helebê û pêkanîna bendên peymana derbarê taxên Şêxmeqsûd û Eşrefiyê de, duh bi nûnerên hikumeta demkî ya Sûriyeyê re civiyan.
Bi armanca kêmkirina rageşiya li Helebê û pêkanîna bendên peymana derbarê taxên Şêxmeqsûd û Eşrefiyê de, duh êvarî nûnerên Bakur û Rojhilatê Sûriyeyê û nûnerên hikumeta demkî ya Sûriyeyê li bajarê Helebê civiyan.
Li gorî nûçeya ANHAyê; di hevdîtinê de berpirsên Rêveberiya Xweseriya Demokratîk a Bakur û Rojhilatê Sûriyeyê, fermandarên HSDê û hejmarek rayedarên hikûmeta demkî amade bûn.
Di civînê de, aloziya vê dawiyê li Helebê rû daye, liv û tevgera hêzên hikûmeta demkî li derdora taxên Şêxmeqsûd û Eşrefiyê, domandina pêkanîna bendên Peyama 1ê Nîsanê ya derbarê her du taxan de hatin gotûbêjkirin. Her wiha behsa mekanîzmeya avakirina komîteyên pêkanîna peymanê kirin.
Her du aliyan li ser rawestandina rageşî û tevgera leşkerî ya hêzên hikumetê li derdora her du taxan û lidarxistina civînan di navbera komîteyên têkildar ên her du aliyan de li hev kirin.
Hêjaye bibîrxistinê ye ku 1ê Nîsana îsal Meclisa Taxên Şêxmeqsûd û Eşrefiyê û hikumeta veguhêz peymanek ji 14 bendan îmze kiribûn. Peyman girêdayî pêşxistina jiyana hevbeş û parastina niştecihên her du taxan, qedexekirina diyardeyên leşkerî, birêxistina ewlehiya navxweyî, hêsankirina tevgera çûn û hatina şêniyên her du taxan, her wiha avkirina komîteyên pêkanîna bendên peymanê ye.
