Serokê Meclîse Numan Kurtulmuş di civînê 8an de axivî û anî ziman ku geşedanên Rojhilata Navîn girîngiya komîsyonê nişan dide û wiha got: “Komîsyona me berpirsyariyeke dîrokî digire. Em weke gelên herêmê mecbûr in yekîtiya xwe nîşan bidin.”
Komîsyona Demokrasî, Xwişk-Biratî û Hevgirtina Mîllî ku di çerçoveya pêvajoya Aştî û Civaka Demokratîk de li meclîsê hatibû avakirin civîna xwe ya 8an pêk anî. Di civîna 8an de Konfederasyona Sendîkayên Kedkarên Cameweriyê (KESK), Konfederasyona Sendîkayên Karkêrên Şoreşger (DÎSK), TURK-ÎŞ, HAK-ÎŞ, MEMUR-SEN, TURKİYE KAMU-SEN û BÎRLEŞÎK KAMU-ÎŞ wê bên guhdarkirin.
Rûniştina civînê bi axaftina Serokê Meclîse Numan Kurtulmuş re destpê kir. Numan Kurtulmuş bertek nîşanî êrîşa Îsraîlê ya li dijî Qatarê da û wiha got: “Îsraîlê êrişî Qatarê kir. Îsraîl bi vê êrîşê dibêje, ez dikarim li her welatî her kesî bikujim. DYA, çi baregehên wê hebin jî, ne gelên herêmê ne jî welatên herêmê nikare biparêze. Ev yek têkiliyeke dijminatiyê bi hemû gelên herêmê re nîşan dide. Ev êrîş divê hişyariyeke kûr ji bo me hemûyan e.”
Kurtulmuş li ser xebatên komîsyonê jî ev tişt anî ziman: “Komîsyona me berpirsyariyeke dîrokî girtiye ser milê xwe. Em weke gelên herêmê mecbûr in yekîtiya xwe nîşan bidin. Armanca komîsyona me ev e. Yekîtiya neteweyî, bi Tirk, Kurd û cihêrengiyên etnîkî û mezhebî re xwiş-biratiyê ava bike. Li Tirkiyeyê standartên demokrasiyê bilind bike û welatekî ku her kes bi azadî û ewlehiyê tê de bijî ava bike. Ev armanca sereke ya komîsyonê ye. Tirkiyeyeke bêteror wê bibe misogeriya herêmeke bêteror. Em jî ji bo ev xebat zû bigihêje encamê dixebitin.”
Piştî axaftina Numan Kurtulmuş nûnerên saziyên beşdarî civînê bûnê wê bên guhdarkirin.
