Kurd û dostên wan bi pêşengiya Înîsîyatîfa Rojnamegerên Kurd li Londonê li pêşiya avahiya BBCyê kom bûn û diyar kirin ku hedefgirtina rojnameger Nazim Daştan û Cîhan Bîlgîn a ji aliyê dewleta Tirk ve sûcê şer e.
Kurd û dostên wan li ser banga Înîsiyatîfa Rojnamegerên Kurd a Brîtanyayê û Meclîsa Gelê Kurd, li Londonê li pêşiya avahiya BBCyê kuştina rojnameger Nazim Daştan û Cîhan Bîlgîn protesto kirin. Di çalakiyê de pankartên bi wêneyên Nazim Daştan û Cîhan Bîlgînê û alayên bi wêneyên Rêberê PKKê Abdullah Ocalan hilgirtin. Di çalakiyê de timî dirûşmeyên “Şehîd namirin”, “Bijî berxwedana Rojava”, “Dewleta Tirk a Terorîst” berzkirin û ji bo BBCya ku naxwaze qetilkirina rojnamegeran bibîne dirûşmeya “Şerm bikin” berz kirin. Li ser navê Înîsîyatîfa Rojnamegerên Kurd a Birîtanyayê Îlham Bakir û Nejla Arî axivîn. Rojnamevan û nivîskar Îlham Bakir diyar kir ku rojnamevan Nazim Daştan û Cîhan Bîlgîn hedef hatine girtin û qetilkirin. Bakir, bi domdarî wiha got: “Qetilkirina rojnamevanên ku li ser karê xwe, li gor hemû peymanên navneteweyî sûcê şer e. Yên ku ev êrîş kirine, da ku sûcên wan ên şer dernekevin holê û rastî di tariyê de bimînin rojnamevan kirin hedef.”
Dê kampanya we li erdê nemîne
Îlham Bakir diyar kir ku Nazim û Cîhan nûnerên Çapemeniya Azad in ku ji bo nîşandana heqîqetê bi dehan şehîd dane. Îlham Bakir anî ziman ku dewleta Tirk ev sed sal in rojnamevanên Kurd ên ku qetlîam, zext û sûcên şer yên ku dewleta Tirk li ser gelê Kurd pêk tîne, ji raya giştî re radigihînin hedef digire û wiha dewam kir: “Niha em jî ji vir, wek rojnamevanên li ser rêça rojnamegeriya azad, bi himbêzkirina wê kena te ya mezin soz didin te Nazim; bi ramûsana agirê heqîqetê yê li ser rûyê te soz didin te Cîhan; em soz didin we û hemû şehîdan, dê pênûs û kameraya we li erdê nemîne.”
Çima bêdeng in?
Nejla Arî jî bal kişand ser bêdengiya BBCyê û got: “Em îro li vir ji bo hevalên xwe yên ku bi awayekî hovane hatin qetilkirin kom bûn. Dibe ku hûn bipirsin çima BBC? Ji ber ku dema mijar dibe Kurd, BBC her tim bêdeng e. Em îro ji bo lêpirsîna vê bêdengiyê li vir in. Em dixwazin fêm bikin ku çima BBC li hemberî qetilkirina du rojnamevanan bêdenge?”
Piştî rojnamegeran, nûnerên rojnameyên çepgir ên şoreşger ên li Londonê jî axivîn û qetilkirina Daştan û Bîlgînê şermezar kirin. Her wiha diyar kirin ku ew ê bi çapemeniya Kurdî re li pey şopa heqîqetê di nava piştevaniyê de bin.
Çalakî bi çepik, dirûşme û tilîliyan bi dawî bû.
