Cenazeyê endamê HPGê Alî Kemal Arslan ê ku 6 sal berê di pevçûnê de jiyana xwe ji dest dabû, li bajarê ku lê ji dayik bû hat definkirin.
Cenazeyê endamê HPGê Alî Kemal Arslan (Roşer Tolhildan) ê ku di 19ê Îlona 2019an de li Semsûrê jiyana xwe ji dest da û li goristana bêkesan a Meletiyê hatibû definkirin ji hêla malbatê ve hat wergirtin û anîn Semsûrê. Cenazeyê Arslan li ber deriyê Goristana Karapinarê bi pêşengiya MEBYA-DERê ji aliyê malbat, xizmên Arslan û nûnerên gelek partî û rêxistinên girseyî yên demokratîk ve hate pêşwazîkirin. Girseyê darbesta Arslan li ser milê xwe kir û bi dirûşmeyên “Şehîd namirin” û “Bijî Serok Apo” heta gorê meşiya. Cenazeyê Arslan bi duayan hat definkirin.
Piştî deqîqeyek rêzgirtinê, Hevserokê MEBYA-DERê yê Rihayê Erhan Akyilmaz li ser gora Arslan axivî û got, “Heval Roşer jiyan û xatirxwestina xwe veguherand meşek bi rûmet. Şehadeta wî ne dawî ye, wekî pêşerojek azad pêşkêşî gel kir. Şehîd namirin.” Piştre Dayika Aştiyê Adalet Çay axivî û kesên ku di têkoşîna azadiyê de jiyana xwe ji dest dane bi bîr anî û got, “Em destê xwe ji bo aştiyê dirêj dikin. Bila ev şer û rijandina xwînê bi dawî bibe. Bila gav bê avêtin.”
Hevserokê DEM Partiyê yê Semsûrê Mehmet Bayir diyar kir ku Arslan ji bo azadiya Kurdistanê têkoşiya û got, “Em soz didin ku heta ev welat azad bibe em ê têbikoşin.”
Parlamenterê DEM Partitê Ferît Şenyaşar qala Pêvajoya Aştî û Civaka Demokratîk kir û got, “Barekî giran li ser milê gelê Kurd e. Divê em xwedî li vê têkoşînê derkevin. Tevî hemû êşan jî, em ji aştiyek birûmet re amade ne.”
Sersaxiya Arslan wê li mala sersaxiyê ya li kêleka Nexweşxaneya Dewletê 82 Yilê were qebûlkirin.
