Elîh – Platforma Saziyên Demokratîk a Êlihê di salvegera Komploya Navneteweyî ya 9ê Cotmehê daxuyanî da û got: “Azadiya civakê azadiya Rêbertî ye.”
Hevserokê ARÎ-DERê Mazlûm Tenha diyar kir ku komploya 9ê Cotmehê dijî belav bûna fikrên Rêberê Gelê Kurd Abdullah Ocalan pêk hat.
Platforma Saziyên Demokratîk a Elihê di salvegera Komploya Navneteweyî ya 9ê Cotmeha 1998an a li dijî Abdullah Ocalan hatiye pêkanîn, li pêşiya avahiya DEM Partiyê ya Elihê daxuyanî da. Nûner, rêveberên partiyên siyasî, endamên saziyan sivîl û gelek kes tev daxuyaniyê li bûn. Hevserokê Komeleya Lêkolînên Ziman û Çandê ya Ariyê (ARÎ-DER) Mazlûm Tenha xwend.
‘Kapîtalîst xwestin ramana Birêz Ocalan teslîm bigirin’
Mazlûm Tenha anî ziman ku ji ber ku raman û paradîgmaya Birêz Abdullah Ocalan pêş ketibû, komplo pêk hat û wiha axivî: “Fikra Birêz Abdullah Ocalan li hemberî sîstema şer, îstîsmar û serdestiyê ku gelan rû bi rû dihêle, bi perspektîfa Kurdistana Azad û Rojhilata Navîn a Demokratîk, derketineke aştiyê bû. Navendên Modernîteya Kapîtalîst xwestin vê ramanê teslîm bigirin û îradeya azad a gelan dîl bigrin. Lê belê, tevî şertên giran ên tecrîdê yên ku ev 26 sal in li Îmraliyê didomin, berxwedana Birêz Ocalan, weke rawestgeha ramanî û siyasî ya di asta dîrokî de, armanca komployê pûç kiriye.”
‘Berxwedana birêz Ocalan tarîtiyê perçe kir’
Di berdewama axaftina xwe de Mazlûm Tehna diyar kir ku gelê Kurd zêdetirî sed sal e li dijî polîtîkayên înkar û qirkirinê li ber xwe dide û ev tişt anî ziman: “Têgîna ‘Kurd tune ne’ bûye îdeolojiya hevpar a avakirinê ya her çar netew-dewletan. Her hewldana mafdarî, bi tundî hatiye tepisandin. Lê belê kevneşopiya berxwedanê ya li ser vê axê, her carê ev tarîtiya hanê parçe kiriye. Derketina Birêz Ocalan li ser qada dîrokê, mohra ‘em hene’ li ser zincîrên înkarê hate danîn. Qonaxa dîrokî ya ku gelê Kurd bi têkoşîna xwe ya azadiyê ya 52 salan gihîştiye, êdî demeke wisa afirandiye ku tu hêz nikare bibêje ‘Kurd tune ne’. Îro îradeya gelê me, ramana û rêxistinbûna gel, nîşana herî berbiçav a vê rastiyê ye.”
‘Azadiya Ocalan azadiya gelan e’
Mazlûm Tenha bi bîr xist ku îro gelê Kurd li qadan bi gotina “Bê Serok Jiyan Nabe” berz dike û axaftina xwe wiha dawî kir: “Ev gotin ne tenê dirûşmeyek e; daxuyaniya îradeyê ye ku têkiliya diyalektîka jiyana azad û Rêbertiya azad, bi awayekî herî zelal tîne ziman. Azadiya Birêz Ocalan, ji bo aştiya gelan û paşeroja demokratîk gaveke herî berbiçav e. Dema ku em li dijî komployê dengê xwe bilind dikin, bila em dengê azadî û aştiyê jî bi hev re bilin bikin.”
‘Xilasiya gêlên li Tirkiyeyê dê bi fikrên birêz Ocalan pêk werê’
Parlamentera Elihê Zeynep Oduncu Kutevî jî diyar kir ku Rêberê Gelê Kurd Abdullah Ocalan hêj di serê berxwedana xwe de azadiya gelê Kurd anîbû ziman û wiha got: “Ji wê demê heta niha fikra birêz Ocalan heman e, komployê di bin tarî de hişt. Komplo serneket û îro fikrê birêz Abdullah Ocalan gihişt mîlyonan. Îro her kes dizanê ku xilasbûna gelên li Tirkiyeyê bi fikrên birêz Ocalan pêkan e.”
Daxuyanî bi berzkirina dirûşma “Bijî Serok Apo” bi dawî bû.
