Meşa “Em ê karê xwe paşve bistînin” ya KESKê gihişt Rihayê. Hevseroka KESKê Ayfer Kocak diyar kir ku ji ber wan dengê aştiyê bilind kir, hatin ixrackirin.
Platforma Konfederasyona Sendikaya Karkerên Cameweriyê (KESK) ji bo kesên ku bi rêya KHKê ji karê xwe hatin dûrxistin, bi şîara “Em ê karê xwe paşve bistînin” ji Amedê ber bi Enqereyê ve dest bi meşê kir. Meşvan gihiştin Rihayê. Dema girse hat Parqa Elî Şellî ya Xelîliyê ji aliyê endamêm KESKê, parlamenterê Rihayê ya DEM Partiyê Ferît Şenyaşar, rêxistina DEM Partiyê ya Rihayê û gelek kesan ve hatin pêşwazîkirin. Girse li vir heta Qada Topçiyê dest bi meşê kir.
Polîsan pêşiya meşvanan girt. Meşvan li dijî astengkirina polîsan bi berzkirina dirûşma “Bijî berxwedana kedkaran” li ber xwe dan. Polîs neçar man ku rê vekin. Girse heta qadê meşiyan. Di meşê de dirûşmên “Jin Jiyan Azadî”, “Bijî berxwedana kedkaran”, “Kedkarên KESKî rûmeta me ne” berz kirin. Dema girse hat qadê daxuyanî hat danîn.
Daxuyanî ji aliyê Hevseroka Şaxa Egîtîm-Senê ya Rihayê Ozlem Ûlûtaş Şengul ve hat xwendin. Ozlem Ûlûtaş Şengul diyar kir ku mînaka “Akademisyenên aştiyê” neheqiya herî mezin e û da zanîn ku heta dawiyê ew ê berxwedana xwe mezin bikin.
‘Sedema îxrackirina me xwedîderketina aştî û axa welatê me bû’
Paşê Hevseroka KESKê Ayfer Kocak axivî û diyar kir ku 9 sal berê desthilatdar bi cemaata Gulen re ket di nava şer de û ev tişt anî ziman: “Hevalên me hatin îxrackirin lê ne tenê hevalên me hatin îxrackirin. 125 hezar kes hatin îxrackirin. Em ê bajar bajar bigerin sedema ixrac kirina xwe bînin ziman. Sedema ixrac kirina me xwedî derketina aştî û axa welatê me bû. Me ji ber ku tenduristî bila zimanê zikmakî pêk werê em hatin ixrac kirin.”
‘Nêzikbûna aştiyê nêzikbûna KESKê ye’
Ayfer Kocak anî ziman ku pêvajo ji bo wan gelek girîng e û wiha axivî: “Nêzikbûna aştiyê nêzikbûna KESKê ye. Ji ber ku me dengê aştiyê bilind kiribû em hatin ixrackirin. Me berê pêşniyar kiribû ku bila komîsyon bê avakirin. Îro ev pêk hat.”
‘Heta ku ji aştî her kesî re pêk werê em e li cem kedkaran bin’
Paşê Parlamenterê DEM Partiyê Ferît Şenyaşar axivî û diyar kir ku berî 9 salan derbeyek bikontrolî pêk hat û wiha axivî: “Gelek neheqiyên giran pêk hat. Îro pêvajoyekî heye em ji bo her kesî aştiyê dixwazin. Heta ku ji aştî her kesî re pêk werê em e li cem kedkaran bin.”
Piştî daxuyaniyê kedkar ber bi Semsûrê ve rê ketin.
