DEM Partî û DBPê li Cizîrê malbatên Malgaz û Çemar li hev anî.
Li navçeya Cizîrê ya Şirnexê malbatên Malgaz û Çemar bi salan e ji ber şerekî navbera wan de çêbûbû ji hev xeyîdî bûn. Îro bi pêşengtiya rêxistinên DEM Partî û Partiya Herêmên Demokratîk (DBP) yên Şirnexê di navbera malbatan de silh pêk hat.
Rêxistinên DEM Partî û DBPê bi endamên malbatan re li avahiya DEM Partiyê ya Cizîrê hatin gel hev. Li vir Mele Qasim Yîgît got ku endamên herdu malbatan ji bo Tevgera Azadiyê gelek berdêl dane û wiha axivî: “Dijminê me nirxên me yên civakî hedef digire. Li cihê ku em hev re bimînin divê em ji bo têkoşîna gelê xwe tevbigerin.”
Hevseroka DEM Partiyê ya Şirnexê Taybet Bîlge anî ziman ku di şerên navxweyî de yên herî zêde bandora neyînî dijîn jin in û wiha axivî: “Jin her tim aştiyê dixwazin û ji bo vê têkoşîn didin. Bila ciwanên me ji pirsgirêkên wiha êdî azad bibin û hêza xwe li hember dijmin bikar bînin.”
Hevserokê DEM Partiyê yê Şirnexê Ramazan Ûysal jî spasiyên xwe pêşkêşî malbatan kir û piştî axaftina Ûysal bi xwendina duayan malbat li hev hatin.
