Şirnex – Her çiqas Waliyê Şirnex bibêje “ez destûrê nadim birîna daristanan û ez ê li dijî vê yekê têkoşîn bidim” jî di bin kontrola leşkeran de cerdevan li Çiyayê Gabarê talanê dikin.
Li Şirnexê ji sala 2019an ve bê navber talana daristanan berdewam dike. Li dijî talana daristanan a li çiyayên Cûdî û Gabar her wiha Herêma Besta her çiqas bertek werin dayîn û çalakî werin lidarxistin jî bi destûra Walitiya Şirnexê û Gerînendeya Karên Çandinî û Daristanan û bi destê cerdevanan talan berdewam dike.
Walî dibêje tuneye lê dîmen wisa nabêje
Waliyê Şirnexê di daxuyaniyek xwe ya 19ê mehê de gotibû, ‘kesên talanê dikin ji me re ragihînin em ê li dijî wan têkoşîn bidin.’
Lê dî dîmenên gihiştine ber destê ajansa me de xuya dike ku piştî axaftina Waliyê Şirnexê 3 rojan di bin kontrola leşkeran de bi destê cerdevanan daristan hatine birîn.
Her roj li deverekî talan pêk tê
Çavkaniyên xwecihî ji ajansa me re ragihandin ku duh li gundê Xursê yê navçeya Basa ya Şirnexê talana darana dest pê kiriye. Her wiha çavkaniyên ku ji ber ewlehiyê nexwestin navê xwe bidin dan zanîn ku daristan bi destê cerdevanên gundên Şerefiyê û Darayê yên Şirnexê, dîsa cerdevanên bajaroka Sêrgirkê yê Şirnex tên birîn.
Di bin çavdêriya leşkeran de daran dibirin
Hêjayî gotiyê ye ku di nûçeya Ajansa Mezopoyamyayê (MA) ya duh de hatibû eşkerekirin ku dema welatiyekî xwestibû dîmenên talanê bikişîne leşkeran telefona wî desteser kiribûn û dîmenên di telefonê de jê biribûn. Her wiha leşkeran gef li welatî xwarine ku ger dîmenek derkeve holê ew vê yekê ji welatî dizanin. Bi vê yekê ji xuya dike ku talan bê çawa bi çavdêriya leşkerên di bin fermana Waliyê Şirnexê de pêk tê.
