Qendîl– Tevgera azadiyê vekişîna gerîlayên HPGê û YJA-Starê ya li ser banga Rêberê Gelê Kurd Abdûllah Ocalan a ji bakurê Kurdistanê bi daxuyaniyekê ji raya giştî re aşkere kir. Rojnameger ji çar aliyê hatin bername şopandin.
Tevgera Azadiya Kurdistanê li gor biryarên 12emîn kongreya PKKê, îro di daxuyaniya bi tevlêbûna Endamê Konseya Rêveber a KCKê Sabrî Ok, Fermandara Yekîneyên Jinên Azad-Star (YJA-Star) Vejîn Dersîm û Endamê Konseya Leşkerî ya HPGê Devrîm Palû de diyar kirin ku wan dest bi vekişîna hêzên xwe yên leşkeri ji bakurê Kurdistanê kiriye.
Li Binarê Qendîlê daxuyaniya dîrokî dan
Bernameya daxuyaniya vekişîna gerîlayên HPGê û YJS-Starê li quntarên çiyayên bajaroka Binarê Qendîl pêk hat û cihê bernameyê beriya ku bername destpêbike bi 3 saetan ji çapemeniya hatiye dawetkirin re hat ragihandin. Li ser diyarkirina cihê bernameyê çapameniya amade ber bi cihê daxuyaniyê ve çû û di têketina qadê de ji bo ewlehiyê lêgerînek li ser kesên daxilî qadê bibin pêk hat.
Li qadê wêneyê Rêberê Gelê Kurd Abdûllah Ocalan
Dema em ketin qadê destpêkê dika ji bo daxuyaniyê hatiye amadekirin bala me kişand, li pişt cihê daxuyanî were dayîn wêneyê Rêberê Gelê Kurd Abdûllah Ocalan hatibû daliqandin û sê kursiyên li pişt maseyan hatibûn danîn. Li qadê ji bo kesên daxuyaniyê bişopînin cihê bikarin bixebiitin hatibû amadekirin. Vexwarin jî li bine konekî de hatîbûn danîn.
Ji çar aliyê cîhanî şopandina daxuyaniyê
Ji çar aliyê Kurdistanê, Ewrûpa, gelek welatên biyanî û ji welatên Ereban ajans û qenalên tevevîzyonan daxuyaniya vekişandina hêzên leşkerî şopandin. Beriya ku bername destpêbike her kesî amadekariyên xwe temam kirin û ji bo bername destpêbike li benda hatina Hêzên Tevgera Azadiya Kurdistanê rawestiyan. Dema ku em li qadê benda destpêkirina bernameya bûn ji nişka ve destpêkê Endamê Konseya Rêveber a KCKê Sabrî Ok, Endama YJA-Starê Vejîn Dersîm û Endamê Konseya Leşkerî ya HPGê Devrîm Palû daketin qadê û bi vê yekê hemû rojnemevanên li qadê bi wênekêş û qemereyên xwe ber bi wan ve meşiyan.
8 gerîlayên YJA-Starê 17 gerîlayên HPGê yên ku vekişiyane tevil daxuyaniyê bûn
Dema ku Sabrî Ok, Vejîn Dersîm û Devrîm Palû derbas bûn vê carê 7 jê jin tevahî 23 gerîla xuya kirin û bi çekên xwe ketin qadê û li bin siya wêneyê Rêberê Gelê Kurd Abdûllah Ocalan bi cih bûn.
Daxuyanî Sabrî Ok û Vejîn Dersîm xwend
Daxuyaniya bi Tirkî ji aliyê Sabrî Ok û ya Kurdî ji aliyê Vejîn Dersîm ve hat xwendîn. Piştî daxuyaniyê Sabrî Ok pirsên rojnemevanan bersivandin.
Gerîla ji herêmên Botan, Serhat, Garzan û Amedê vekişiyane
Gerîlayên ji bakurê Kurdistanê vekişiyane piranî ji herêmên Botan, Amed, Serhed û Garzanê piştî biryarên kongreyê dest bi vekişînê kirine. Vejîn Dersîm ku daxuyaniya Kurdî xwend Fermandara Eyaleta Serhedê ye û ji piştî biryara kongreya 12emîn ji Herêma Serhedê dest bi vekişandinê kiriye, her wiha Fermandarê Konseya Leşkerî ya HPGê Devrîm Palû jî ji Herêma Garzanê hatiye Qadên Parastinê ên Medyayê.
