Amed – Welatiyên Amedê têkildarî biryara vekişandina Tevgera Azadiyê ya ji Tirkiyeyê diyar kirin ku ev vekişandin ji bo dewletê şensek e û gotin “Gêrîla bi vekişînê şanseke din da dewletê.”
Rêberê Gelê Kurd Abdullah Ocalan ku di 27ê Sibatê de banga “Aştî û Civaka Demokratîk” kir. Piştî bangê PKKê di 1ê Adarê de agirtberst îlan kirin. Li ser bangê PKKê di 5-7ê gulanê de 12emîn Kongreya xwe pêk anî. Di 11ê Tîrmehê de komek gerîla ku ji 30 kesan pêk dihat çekên xwe şewitandin. Herî dawî jî di çarçoveya biryarên kongreye de koma gerîla ku ji 25 kesan pêk dihat di 26ê Cotmehê de daxuyanî dan û biryara xwe vekişînê aşkere kirin. Rêveberiya Tevgera Azadiyê aşkere kir ku wan biryar daye ku hêza xwe ji Tirkiyeyê vekişînin.
Welatiyên Amedê derbarê vekişînê de axivîn.
Welatî Mazlûm Guzel diyar ku PKKê tu carî paşve gav navêje û dixwaze ku êdî dewlet gav biavêje û wiha axivî: “Hevalê Sabrî jî di daxuyaniya xwe de got, ‘Komisyona hatiye avakirin karê xwe bi cih neaniye.’ Divê komîsyon gav biavêje. Serokatî jî dixwaze komisyon peywirên xwe yên demokratîk pêk bîne. Vekişîna gerîla şendeke din dide dewletê. PKKê ji bo Kurdistan û Tirkiyeyê û ji bo hemû gelên Rojhilata Navîn gavên erênî avêt. Armanca PKKê azadî û aştiya civaka Kurd û hemû civakan e. Dewlet hê jî di wê baweriya xapandina Lozanê de ye. Dibe ku plana Lozanê û niha yek be. Lê Kurdên wê demê û niha ne yek in. Kurd dixwazin wî mafê xwe yê ku di Lozanê de winda kiribûn, niha bi dest bixin. Kurd heta mafên xwe yên bingehîn nestînin dê tu carî paşve gavan navêjin. Kesên dewletê bi rêve dibin diguherin, lê hişmendiya dewletê naguhere. Duh Mustafa Kemal, Adnan Menderes, Kenan Evran bûn. Îro jî Tayîp Erdogan e.”
‘Gaveke pir bi şanaz e’
Esnaf Mehmet Pekdogan jî li ser vekişînê nirxandin kir û got: “Di 1993an de PKKê agirbest îlan kir. Niha dîsa li ser banga birêz Abdullah Ocalan gerîla heza xwe vekişand. Ev gav li dijî kesên ku dixwazin pirovokasyon pêk bînin gaveke pir girîng e. Gelê me bi vê gavê pir bi şanaz e. Em dixwazin dewlet jî gavên erênî biavêje. Divê êdî dewlet jî zagonên entegrasyonê bide derxistin. Ji bo ku gerîla bên bi hêsanî siyaset bikin, divê dewlet zagonên azadiyê amade bike. Dewlet van gavên xwe weke muzakere dide nişandan. Dewlet dixwaze bi biryara xwe Tevgera Kurd bike rewşeke xetere.”
‘Aştî ji şer zehmetir e’
Esnaf Tûfan Yildirim jî li ser nêzîkatiya dewletê rawestiya û got: ”Gerîla bi vê gavê xwest dewletê bîne ser xeteke rast û aştiyeke mayînde. Gel dixwaze dewlet gavên çareseriyê bavêje. Ku dewletê xwestibûya dikarîbû zûtir gav avêtibûya û dê 40-50 salan şer pêk nehata. Ji bo aştiyê divê em bêtir xwe bi rêxistin bikin. Divê em aştiyê li benda dewletê nehêlin. Aştî ji şer zehmetir e. Rêberê Gelê Kurd û Tevgera Azadiyê wê fedakariyê dane ber çavan.”
‘Ez pir bi gav avêtinê serbilind in’
Aygul Atsiz jî diyar kir ku ew dixwazin êdî dewlet jî gavan biavêje û got: “Em jî aştiya bi rûmet dixwazin. Divê serok û girtî tev bêne berdan. Bila êdî mirov neyên kuştin. Me dît gerîla geveke mezin avêt. Em bi gav avêtinê serbilind in. Em dixwazin êdî dewlet jî gav biavêje.”
‘Em bi dewletê ne bawerin’
Esnafê salan Faruk Akyolê jî anî ziman ku ew tu carî ji dewleta Tirk ne bawere û got: “Em bi serokatiyê bawerin. Em ji dewletê bawer nakin. Di vê pêvajoyê de tu bawerî nadin mirovan. Rêhevalên me çi bikin em ji wan bawer in. Îro pêrdivî bêtir bi aştiyê heye. Dema ku wekhevî û edalet tune be hewcedarî bi xwiş-biratiyê jî namîne.”
