Li Nisêbînê welatiyan li dijî hewldanên astengkirina polîsan barîkat derbas kirin û 1ê Mijdarê Roja Kobanê ya Cîhanê pîroz kir. Her wiha 1ê Mijdarê li Îzmîrê jî hate pîrozkirin
Bi pêşengiya Platforma Saziyên Demokratîk (DEKUP) li navçeya Nisêbînê ya Mêrdînê bi wesîleya 1ê Mijdarê Roja Kobanê ya Cîhanê meş pêk hat. Bi sed hezaran kes li Parka Barişê hatin gel hev û xwestin ber bi deriyê sînor yê Nisêbîn-Qamişlo ve bimeşin. Lê polîsan barîkat danîn û astengî derxistin. Gel tevî zextan bi dirûşmeyan meşiya.
Gel sê saetan sekinî û piştî ku ji muzakereyan encam negirt derbasî meşê bû. Gel bi dirûşmeyan meşiya û got ew di çalakiya xwe de bi israr e û gihişt sînor.
Pişt re li ser navê DEKUPê metna daxuyaniyê hat xwendin. Hatîce Oncu axivî û da zanîn ku Şoreşa Rojava hêviya jin û ciwanan e û got wê ji bo mezinkirina şoreşê bi hev re têbikoşin û îradeya aştiyê biparêzin.
Parlamentera DEM Partiyê Berîtan Guneş jî axivî û da zanîn ku tu kes nikare şoreşa agelan bifetisîne.
Piştî daxuyaniyê pîrozbahiyê li seranserê sînor berdewam kir.
Îzmîr
1ê Midarê Roja Kobanê ya Cihanê li Îzmîrê hate pîrozkirin. Bi beşdariya gelek kesan li pêşiya Navenda Çandê ya Turkan Saylanê daxuyanî hate dayîn. Di daxuyaniya ku hate xwendin de êrişên li ser Rojava û gelê Kurd hatin şermezarkirin.
