Rêxistinên maf û hiqûqê li ber Girtîgeha Erzînganê daxuyanî dan û saziyan xwest îşkence û zilma li ser girtiyan tê kirin tavilê were bidawîkirin.
Bi pêşengiya MED TUHAD-FEDê li ber Kampûsa Girtîgeha Erzînganê li dijî neheqiya li girtiyan tê kirin daxuyanî hate dayîn. Parlamentera DEM Partiyê ya Dêrsimê Ayten Kordu, rêveberên DEM Partî û DBPê yên bajarên bajarên Çewlîg, Dersîm, Xarpêt û Erzînganê, rêveberên Saziya Pîr Sûltan Abdalê ya Erzînganê, rêveberên MED-TUHAD FEDê, OHDê, Baroya Amedê û TUHAY-DER a Amedê û gelek malbatên girtiyan tev li daxuyaniyê bûn. Di daxuyaniyê de pankarta “Azadî ji girtiyan re, aştiya civakî” hat vekirin.
Di daxuyaniyê de Ayten Kordu axivî û bal kişand ser rewşa girtiyan û pêvajoyê û wiha got: “Em di pêvajoyekê de ne û dibêjin ku bila zindan werin valakirin lê her roj bi hincetên pûç li ser girtiyan zext pêk tên. Tevî pêvajoyê jî şert û mercên girtiyan ber bi xerabiyê ve dibin. Ji ber vê rewşê girtî jî ketine greva birçîbûnê.”
‘Zextên li ser girtiyan zêde bûn e’
Endamê Baroya Amedê Suleyman Zaman jî daxuyanî xwend û wiha got: “Di demên dawî de lêgerîna rûtîn li dijî girtiyan zêde bûn e. Ji malbatên girtiyan re her roj dibêjin mevzuat guheriye û legerîna nav dev û tazî li girtiyan dikin. Girtiyên bi navê Nûrcan Aslan, Ardil Çeşme, Abdulmecît Yuksekbag, Mustafa Amutgan û Keleş Celal ji bo ku ‘poşmantî’ qebûl nekirine, berdana wan hatiye taloqkirin.”
5 girtî ketine greva birçîbûnê
Hat zanîn ku 5 girtî ji ber taloqkirina berdanê û astengkirina xebatên atolyeyan, derketina hewadariyê û lêgerîna tezî roja 3yê Mijdarê ketine greva birçîbûnê. Girtiyên ku ketine greva birçîbûnê ev in: Naîm Turkoz, Mahmut Tutal, Îsmaîl Berka, Eren Şîmşek û Şukru Ozalp.
Girtiya bi rêya malbatên xwe sedemê çalakiyê xwe anîn ziman û gotin “Mudîriyeta girtîgehê kujerên jinan tîne tev li me dike, ji hevalên me re dibêjin werin em ê we bibin qawîşên kesên serbixwe ango bêalî. Hevalên me yên nexweş nayên berdan, dermankirin û tena serê xwe dimînin. Nikarin pêdiviyên xwe binîn cih.”
Piştî daxuyaniyê girse ji ber girtîgehê veqetiya.
