Şirnex – Wezîrê Enerjî û Çavkaniyên Xwezayî Alparslan Albayrak di parvekirineke xwe de îdîa kir ku PKKê gundê Berê Mirê vala kiriye. Lê gundiyan wezîr derewand û diyar kirin ku leşkeran gundê wan vala kiriye.
Medyaya girêdayî desthilatê ji destpêka berxwedana Tevgera Azadiyê heya îro bi sedan nûçe û senaryoyên derewîn nivîsîne. Di valakirina bi hezaran gundên bakurê Kurdistanê de jî bi sedan nûçeyên derew ên weke ‘Tevgera Azadiyê gund vala kir, ‘Tevgera Azadiyê gund şewitand’ bi rêya rojnameyên xwe parve kir. Herî dawî Wezîrê Enerjî û Çavkaniyên Xwezayî Alparslan Albayrak 2 roj berê li ser medyaya dijîtal dîmenek weşand. Kesekî alîgirê AKPê di dîmen de digot ku gundê Berê Mirê (Guleşlî) di sala 1994an de ji aliyê PKKê ve hatiye valekirin. Ajansa me xwe gihand şêniyên gund.
Gundiyan destnîşan kirin ku Hêzên Artêşa Tirk (TSK) gundê wan vala kiriye. Ji ber ewlehiyê nexwestin ji kamerayê re biaxivin. Li ser valakirina gund, şêniyên gundê Berê Mirê ji Ajansa Welat re ragihandin. Lê gundiyan ji bo ewlehiya xwe, nexwestin wêne û dîmenên wan bên parvekirin. Her çiqas Wezîrê Enerjî û Çavkaniyên Xwezayî Alparslan Albayrak agahiyên şaş û bêbingeh bi awayekî bi dîmen parve kir jî, gundiyan diyar kir ku ew agahî derew in. Gundiyên gundê Berê Mirê anîn ziman ku leşkeran gundê wan vala kiriye.
Bi balafirên şer êrîşî derdora gund kirin
Gundê Berê Mirê di 1990an de li Çiyayê Gabarê bi destê hêzên artêşa Tirk hate valakirin. Di Gulana 1994an de piştî ku 9 cerdevanan çek danîn leşker ji gund derdikevin. Piştî buyerê bi çend rojan balafirên şer bi hinceta endamên PKKê di nava gund de ne derdora gund bomberan dikin. Bi taybetî jî Çiyayê Bizinan û Newala Kuştiya dibe hedefa balafirên şer.
Li gund 3 welatî bi îşkenceyê hatin girtin
Di serdegirtinên malan de welatiyên bi navê Sabrî Yilmaz, Hamît Yilmaz û Abdûrrahîm Kûrtay bi îşkenceyê tên binçavkirin û piştre wan dişînin girtîgehên navçeya Hezexê ya Şirnexê û navçeya Midyatê ya Mêrdînê.
Ji ber êrîşan koçî gundê Darayê dikin
Di van êrîşan de gelek malên gund zerar dibînin û şêniyên gund ê ku ji 36 malan pêk tê neçar dimînin ku koç bikin. Tevahiya şêniyên gund di navbera 3 rojan de destpêkê mişextî gundê Darayê yê di nava Çiyayê Gabarê de dibin.
Dixwazin bi zorê gundiyan bikin cerdevan
Şêniyên gund bi derfetên xwe li gundê Darayê kon vedidin û 6-7 mehan di konan de bi cih dibin. Lê leşker dîsa zextê li wan dikin. Piştî demekê cerdevan û leşker bi ser gundê Darayê de digirin û zordariyê li şêniyên gundê Berê Mirê dikin ku bibin cerdevan. Li ser vê zordestiya leşkerên TSKê bi qasî 10 kesan dibin cerdevan û şêniyên din li bajarên weke Sêrt, Şirnex û Cizîrê belav didin.
Ji sala 1994an heya 2020an gund vale dimîne
Ji sala 1994an heya sala 2020an li derdora gundê Berê Mirê qaleqol an jî qereqol nehatine avakirin û piştî ku ji aliyê TPOyê ve li Çiyayê Gabarê petrol tê dîtin artêşa Tirk dest bi çêkirina qaleqolan dike. Niha li tevahiya gund qaleqol hatine avakirin û li gelek deverên gund jî qemere hatine bicihkirin.
Ji bo derketina ji gund anons an jî bangewazî nehatiye kirin
Ev agahiyên ku heya niha me parvekirin, yek bi yek ji devê şêniyên gundê Berê Mirê yê girêdayî Şirnex hatine wergirtin û şêniyên gund derbarê dîmena Wezîrê Enerjî û Çavkaniyên Xwezayî parvekiriye de jî gotin ku ew agahî hemû derew in û ji bo derketina ji gund tu dem anons an jî bangewaziyek nehatiye kirin.
