Hevserokê DEM Partiyê Tuncer Bakirhan di civîna hevşaredaran re axivî û got: “Berpirsyarên gelek girîng li ser milê şaredariyan e. Daxwaza me rast û zelal e. Divê hevşaredarên me ku qeyim li şûna wan hatine bicihkirin, vegerin ser kar û wezîfeya xwe.”
Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogullari û Tuncer Bakirhan, li Navenda Kongreyê ya ÇandAmedê ya li navçeya Bajarê Nû ya Amedê bi hevşaredarên DEM Partiyê re civiyan. Hevserokê Giştî yê Partiya Herêmên Demokratîk (DBP) Keskîn Bayindir, parlamenterên DEM Partiyê, rêveberên DEM Partiyê, DBPê û hevşaredar beşdar bûn.
Beriya civîn dest pê bike Hesvserokê Giştî yê DEM Partiyê Tuncer Bakirhan axivî.
Bakirhan diyar kir ku civîna wan a bi hevşaredaran re gelek girîng e û wiha got: “Rexneyên gel ji bo me gelek girîng in. Em di serî de Edîp Solmaz bi rêzdarî bi bîr tînin, em ê li ser rêya wan têkoşîna xwe bidin meşandin. Em ji bo hevşaredarê me yê berê Selçûk Mizrakli re jî silavên xwe dişînin. Her wiha em Serokê Şaredariya Esenyurtê Ahmet Ozer ku hat berdan jî silav dikin. Hemû hevalên me yê siyasetmedar bi awayekî bêhiqûqî hatine girtin. Em ê di civîna xwe de xebatên salek û nîvê yên şaredariyên xwe bi hev re nîqaş bikin.”
‘Divê em şaredariyan weke komînan binirxînin’
Tuncer Bakirhan destnîşan kir ku peyama Rebêrê Gelê Kurd Abdullah Ocalan a 27ê Sibatê jî ji bo wan gelek girîng e û wiha axivî: “Divê em vê peyamê ji bo xwe binirxînin. Dema ku em dibêjin aştî, yekîtî û wekhevî tê bîra mirov. Divê em her şaredariyê weke komînan binirxînin. Bajarê ku em lê dijîn dibe ku me li hemû deverên bajêr xizmeta li dijî tiryakê û bi vî awayî xebatên xwe yên herêmî bidin meşandin. Divê yên ku vê pêvajoyê bidin meşandin yek ji wan jî hevşaredar bin. Bendewariya civakê ew e ku hevşaredarên qeyim tayînê şûna wan hatine kirin dîsa vegerin ser kar û wezîfeya xwe. Hê hevalên me deynên qeyiman neqedandibûn, qeyim tayînî şûna wan hatin kirin. Qeyiman şaredariyên me di bin deynan de hiştiye. Tu kes jî li ser wan raporên ku qeyiman tiştên bêusil kirine jî dengê xwe nake. Em ê vê cihêkariyê ku bankaya ÎLLERê jî di navbera me û AKPê de dikir ji bîr nekin. Hemû kiryarên wan jî weke yên qeyiman e. Şaredariyên wan diziyê dikin, dengê xwe nakin. Lê dema şaredarî ne ya wan be bi polîtîkayên cihêkar nêz dibin.”
‘Divê şaredariyên me li daxwazên gel guhdar bikin’
Tuncer Bakirhan da zanîn ku ji heft salî heta heftê salî ew bi cihêkariyê re rûbirû dimînin û got: “Em van kiryaran ji nêz ve dişopînin. Dixwazin ku me bi bêhêz bikin. Her tim astengiyan didin derxistin. Ji hemû şaredariyên AKPê re her tişt serbest e, lê dema ku dibe şaredariyên DEM Partiyê ji wan re tu tiştek tune ye. Her sal wezîrên AKPê wesayîtan di diguherînin û li kêfa xwe dinêrin lê hê jî li navçeya Dîgorê ya Qersê wesayîta şaredariyê tune ye. Mesele ev bêedaletî ye. Divê tasarûf bi sekinandina operasyonan bê kirin. Dibe ku kêmasiyên şaredariyên me hebin lê dîsa jî xizmetên baş ji bo ciwanan, jinan, zarokan û hemû civakê dikin. Pirtûkxaneyan vedikin, festîvalan li dar dixin. Xebatên ziman, çanda Kurdî dikin. Paredariyên me xizmetek pirrzimanî dikin. Şaredariyên me xebatek civakî dikin. Xebatên AKPê yên ku tên kirin ji bo gundên ku deng dane wan xizmetê dikin lê yên ku deng nedane wan ji wan re xizmet nayê kirin. Em dikarin bibêjin mînaka şaredariyên me li tu deverê tune ye. Ji ber ku gelek projeyên xweş û xizmetan dane pêşiya xwe. Divê ku li daxwazên gel jî bên guhdarîkirin û qebûlkirin. Heta ku em xwedî li nirxên gel derkevin em ê tim hebin. Divê hevşaredarên me jî ji nirxên gel tu carî xwe dûr nedin. Ger ku em heta îro hatibin vê astê jî bi saya serê nirxên gelê Kurd e. Dema ku em xwe baş bi rêxistin bikin em ê kar û barê xwe jî bi hêsanî pêk bînin.”
