Serokwekîlê Koma DEM Partiyê Sezaî Temellî anî ziman ku ew ji roja ewil ve dibêjin divê komîsyon biçe Girava Îmraliyê û got: “Divê komîsyon êdî biryara çûyina Îmraliyê bide.”
Serokwekîlê Koma Partiya Wekhevî û Demokrasiyê ya Gelan (DEM Partî) Sezaî Temellî derbarê geşedanên di rojevê de Meclîsê civîna çapemeniyê li dar xist. Sezaî Temellî, Hevserokên Giştî yên Komeleya Mafên Mirovan (ÎHD) Oya Ersoy û Cîhan Aydin ku nû hatin hilbijartin pîroz kir û dest bi axaftina xwe kir.
Sezaî Temellî bal kişand ser qanûna weqfan ku 3 hefte ye di rojeva Meclîsê de ye û got ku di qanûnan de xala 11emîn armanc dike ku weqf di destê rêveberiyên herêmî de ne desteser bikin û bertek nîşanî vê yekê da. Sezaî Temellî destnîşan kir ku tevî rojevên girîng û pirsgirêkên civakê jî ev 3 hefte ne AKPê bi qanûna weqfan ve mijûl e û got: “Meclîs bi rojeva AKPê an jî serdestan ve mijûl e. Pirsgirêkên gel û rojeva gel di Meclîsê de tune ye. Her wiha budçeya sala nû jî ji rojeva gel dûr e.”
Cihêkariya li ser bajarên Bakurê Kurdistanê
Sezaî Temellî diyar kir ku bajarên Bakurê Kurdistanê ji budçeya heyî sûdê wernagirin û wiha dirêjî da axaftina xwe: “Ev budçe budçeya sermayeyê. Her tim budçeya sermayê anîn pêş me. Dema em li newekhevbûna herêman dinêrin bi awayek şênber bajarên Kurdan xwe radixin pêş çavan. Li bajarên Kurdan bê edaletî heye. Dibêjin peyva bajarên Kurdan li dijî destûra bingehîn e. Çima li dijî ye? Ev bajar bajarên Kurdan in. Dema ku hûn li newekheviya herêmî dinêrin, ferqek dramatîk derdikeve holê. Teşkîlata Planlamayê ya Dewletê budçe kirine 2 beş û beşek herêma yekemîn e û beşek jî herêma 6emîn e. Bajarên Kurdan di herêma 6emîn de cih digirin. Herêma 1emîn Herêma Marmarayê ye. Ferqek mezin di navberê de heye. Li şûna ku vê ferqê ji holê rakin berovajî vê wê ferqê kûrtir dikin û careke din hemû çavkanî ji rojava re tê vêqetandin û bajarên Kurdan ji nedîtî ve tên.”
‘Budçe ne ji bo gel e ji bo sermayeyê ye’
Sezaî Temellî anî ziman ku li şûna ku budçeyê ji jinan re hîbe bikin lê çavkanî ji sermayeyê re tên vêqetandin û got ku li ser vê yekê daxwazên wan jî hatine redkirin. Sezaî Temellî bi lêv kir ku wan daxwaz kiriye ku 600 hezar deynê cotkaran werin berterefkirin lê ev daxwaz jî hatiye redkirin û got ku wan her wiha xwestiyê mexduriyeta ji ber DEDAŞê ji holê be rakirin jî ev jî hatiye redkirin. Sezaî Temelî her wiha bertek nîşanî Wezareta Xizmetên Malbatî û Civakî da û got ku derdê wan ne jin in derdê wan zêdekirina hejmara zarokan e.
‘Divê qanûnên taybet bên amadekirin’
Piştî daxuyaniyê Sezaî Temellî pirsên rojnamegeran bersivand. Sezaî Temellî li ser pirsa qanûna ku piştî raperîna Şêx Saîd hat derxistin tê nîqaş kirin ku di vê pêvajoyê de jî ev qanûn werin amadekirin ev bersiv da: “Ji banga birêz Ocalan a 27ê Sibatê û gava dawî ya Rêveberiya Tevgera Azadî ya Kurdistanê ya 26ê Cotmehê gavên girîng hatin avêtin, lê ew gav bi yek alî hatin avêtin. Divê gav bi du alî bên avêtin. Gava herî girîng a ku aliyê din bavêje jî çêkirina qanûnên taybet e. Piştî bidawîbûna civînên li komîsyonê dê li ser vê yekê raporek were amadekirin û hevdîtinan bike. Em hêvî dikin ev pêvajo dirêj neajo.”
‘Divê komîsyon biçe Îmraliyê’
Sezaî Temelî li ser pirsa ‘Dê di civîna sibê ya komîsyonê de çûyîna Girava Îmraliyê bê nîqaş kirin an na’ jî ev bersiv da: “Tê payîn ku di civîna sibê ya komîsyonê de ev mijara çûyîna Îmraliyê jî di rojevê de be. Dê were rojeve an nayê em ê jî sibê di civîna komîsyonê de bibînin. Em jî ji roja ewil ve dibêjin divê komîsyon biçe Girava Îmraliyê. Hêvî dikim di demek nêz de komîsyon biryara çûyîna Girava Îmraliyê bide û biçe.”
