Ji bo endamên Konseya Fermandariyê ya HPGê Fetîh Şarlatan û Bedîrhan Abo yên ku navê wan hat ragihandin di dîrokên cuda de li Herêmên Parastinê yên Medyayê jiyana xwe ji dest dane, li Taxa Xaçortê mewlûd hat dayîn.
Ji bo endamên Komîteya Navendî ya PKKê û endamên Konseya Fermandariyê ya HPGê Sabrî Tendurek (Fetîh Şarlatan) û Masîro Xabûr (Bedîrhan Abo) yên ku hatibû ragihandin di salên 2016 û 2020an de li Herêmên Parastina Medyayê jiyana xwe ji dest dane, li Taxa Xaçortê ya navçeya Rêya Armûşê ya Wanê mewlûd hat dayîn. Endam û rêveberên MEBYA-DER, TUHAY-DER, DBP û DEM Partî, aktîvîstên TJAyê, Dayikên Aştiyê, Meclîsa Ciwanan a DEM Partiyê û DPBê, KURDÎGEH, Komeleya Meleyan, Parlmaneter Gulderen Varli, Hevşaredarê Wanê Abdullah Zeydan, hevserokên navçeyan ên DBP û DEM Partiyê beşdarî mewlûdê bûn.
Ji bo kesên di têkoşîna azadiyê û demokrasiyê de jiyana xwe ji dest dane rêz hat girtin. Paşê fatîhe û mewlûd hate xwendin.
‘Bi saya cangoriyan kes nikare Kurdan înkar bike’
Hevseroka DBPê ya Wanê Gonul Ûzûnay di mewlûdê de sersaxî ji malbatan û Rêberê Gelê Kurd Abdullah Ocalan re xwest. Gonul Ûzûnay diyar kir ku gelê Kurd her tim jiyaneke bi rûmet jiyaye û got: “Bi saya vê tevgera azadiyê û şehîd û qehremanan, em dikarin vê jiyanê bijîn. Îro, kes nikare Kurd û Kurdistanê înkar bike. Kurd li çaraliyê cîhanê bi tîpên zêrîn hatine nivîsandin. Navên Kurdan di dîrokê de hatine nivîsandin. Tevahiya gelê me, bi taybetî dayikên me, bedelên giran dane. Di dîroka Kurdan de, rêber û qehremanên mezin an hatine îdamkirin an jî hatine qetilkirin. 26 sal berê, wan dixwest di şexsê Abdullah Ocalan de hemû Kurdan tune bikin, lê bi saya helwesta Abdullah Ocalan û qehremanên Kurd, ev yek têk çû. Di vê gavê de dewlet çûye cem Abdullah Ocalan û ev ji bo Kurdan serkeftinek mezin e.”
‘Divê em aştiya navxweyî ava bikin’
Gonul Ûzûnay di berdewama axaftina xwe de diyar kir ku berxwedana gelê Kurd, cangoriyan û Abdullah Ocalan gihîştiye qonaxa danûstandinan. Gonul Ûzûnay anî ziman ku gelê Kurd ê ku bi sedsalan hatiye înkarkirin, niha tê qebûlkirin û wiha got: “Em dikarin li ser banga Abdullah Ocalan a ji bo aştî û demokrasiyê aştiyê pêk bînin, lê ya herî girîng, divê em aştiya xwe ya navxweyî bi dest bixin. Divê em tifaqa xwe berfireh bikin. Divê em banga aştî û demokrasiyê hembêz bikin. Divê em xwe birêxistin bikin û ji bo vê yekê binesaziyê ava bikin. Tifaqbûn ji bo gelê me yê Kurd pir girîng e. Divê em ziman û çanda xwe biparêzin. Sersaxiyê ji Rêber Apo, gelê me û malbatên me re dixwazim. Wekî ku şehîd Çiyager gotiye, çi dibe bila bibe, dawî wê bi heybet be.”
Piştî axaftinê xwarina mewlûdê hat danîn.
Li gorî daxuyaniya Navenda Ragihandin û Çapemeniyê ya Hêzên Parastina Gel (HPG NRÇ) Endamê Komîteya Navendî ya PKK’ê û Endamê Konseya Fermandariyê ya HPGê Sabrî Tendurek di 18ê Gulana 2016an de, Endamê Komîteya Navendî ya PKKê û Endamê Konseya Fermandariyê ya HPGê Masîro Xabûr jî 27ê Gulana 2020an li Herêmên Parastinê yên Medyayê di êrişên dewleta Tirk de jiyana xwe ji dest dane.
