Li Silopiya polîsan meşa jinan asteng kir. Parlamenter Salîha Aydenîz bertek nîşan da û got ku hêzên ku kuştina jinan asteng nakin îro hatine meşa jinan asteng dikin.
Li navçeya Silopiya ya Şirnexê bi boneya 25ê Mijdarê Roja Tekoşîna Li Dijî Tundiya Li Ser Jinan a Nawneteweyî li gel Parlementera DEM Partiyê ya Mêrdînê Salîha Aydenîz, endam û rêveberên partiyên siyasî, aktîvîstên Tevgera Jinên Azad (TJA) bi sedan jinên li ber avahiya DEM Partiyê kom bûyîn bi bankarta, ‘Bi civaka azad, ber bi jiyana azad û bê tundî’ xwestin heya kolana hunerê bimeşin.
Polîsên ku hemû rêyên diçin kolana hunerê girtibûn destûr nedan ku jin meşê lidarbixin. Li gel hevdîtinên bi polîsan destûr ji bo qedeke cuda hat dayîn û jinan ev yek qebûl nekir û bi çalakiya rûniştinê bertek nîşanê helwesta polîsan da.
Piştî çalakiya rûniştinê Aktîvîsta Tevgera Jinên Azad (TJA) Rengîn Onûk daxuyanî xwend. Rengîn Onûk hemû jinên ji aliyê tundiya mêrserwer ve hatine qetilkirin bi bîr anî û wiha axivî: “Em îro bi rêzdarî, hemû jinên ku ji aliyê şîdeta mêrserwer ve hatine qetilkirin, ji Roza Luxemburg heta Sakîne Cansiz, Nagîhan Akarsel, Sêvê Demîr, Pakîze Nayir, Fatma Ûyar, Taybet Înan, Cemîle Çetîn, Asya Yuksel, Evîn Goyî û bi hezaran hevalên me yên ku navên wan bûne sembola têkoşînê ya bêdawî, bi bîr tînin û em mînetdarê têkoşîna wan in. Soza me ev e ku em ê mîrasa wan a têkoşînê, bi avakirina jiyaneke li ser bingeha azadiya jinê, aştî û wekheviyê tacîdar bikin.”
Rengîn Onûk di berdewama axaftina xwe de bal kişand ser gotinên Rêberê Gelê Kurd Abdûllah Ocalan yên derbarê azadiya jinan de û axaftina xwe wiha bi dawî kir: “Birêz Abdullah Ocalan di çarçoveya îdeolojiya azadiya jinê de jî destnîşan dike, civakek ku jin têde azad nebe, nikare demokratîk be û nikare aştiyê bidomîne. Wî her wiha destnîşan kiriye ku azadiya jinê di nav gotûbêjên çareseriya demokratîk de jî xala yekemîn e û pirsgirêka civakî ya herî bingehîn bi kolekirina jinê destpê kiriye. Şerên ku niha li cîhanê diqewimin, îfadeya herî giran a tundiyê ne û bi destên sîstema kapîtalîst û netewdewletan tên kûrkirin. Di vî şerî de, armanç û qurbana sereke hebûn, ked û nanê jinê ye. Li dijî van polîtîkayên şer û êrîşan, divê em bi awayekî berbiçav bibêjin “Jin, Jiyan, Azadî” û li dijî vî sîstemî bi rêxistinî bisekinin.”
Piştî Rengîn Onûk, Parlementer Salîha Aydenîz got ku dema ew tê Silopya qetilkirina Sêvê Demîr, Fatma Ûysal, Pakîze Nayir, Dayîka Taybet tê bîra wan û wiha axivî: “Qetilkirina van hevalên me nêzîkatiya mêrdewlet ya li hember jinê dide nîşandan. Îro bi sedan polîs meşa jinan asteng dikin û ev kesên qaşo ji bo parastina tundiya li ser jinê ne lê dema ew li ser kar bi sedan jin hatine qetilkirin.”
Salîha Aydenîz diyar kir felsefeya jin jiyan azadî îro ji bo hemû cîhanê mînak e û axaftina xwe wiha bi dawî kir: “Tekoşîna jina Kurd gihiştiye hemû cîhanê. Viya jî tiştekî dide nîşandan ku jina Kurd ji bo azadiya civaka Kurd û hemû civakên cîhanê tekoşîn dide. Rêberê Gelê Kurd Birêz Abdûllah Ocalan îro peyak şandiye û gotiye, ‘Jin bûyîn zehmet e, ev yek ji bo jina Kurd zehmetir e lê ji bo civaka azad û aştiyek bi rûmet divê jin rêxistibûyîna xwe xurtir bike’ Pergala mêr dewlet xençereke di pişta civakê û jinê de. Em ê bi berxwrdan û tekoşîna xwe vê xençera nêr dewlet ji pişta civakê û jinê derxînin.”
Piştî axaftina Salîha Aydenîz girse bi diruşma, ‘Jin jiyan azadî’ belav bû.
