Endamên YYU-KURDÎ bal kişandin ser armanc û xebatên xwe û gotin: “Armanca me parastina zimanê Kurdî ye û em dixwazin di zanîngehê de Kurdî belav bikin.”
Koma Ziman û Wêjeya Kurdî ya Zanîngeha Yuzuncu Yilê (YYU-KURDÎ) di 15ê Gulana 2024an de hat avakirin. YYU-KURDÎ ji bo çand û zimanê Kurdî xebatan dike û dixwaze hişmendiyeke Kurdî di nava xwendekaran de bide avakirin. Di vê çarçoveyê de komê dest bi bernameyên xwe kir. Herî dawî li Eywana Konferansê ya Fakulteya Zanistên Aborî û Îdarî ya Zanîngehê, kurtefîlmên “Navnîşan” û “Pepûk” da nîşandan. Rêveberên YYU-KURDÎyê Berfîn Çîçeklîdal u Yûsûf Abeş derbarê armanc û xebatên koma xwe de axivîn.
Armanca wan parastina Kurdî ye
Berfîn Çîçeklîdal behsa pêvajoya vekirina komê kir û anî ziman ku YYU-KURDÎ bi armanca parastina Kurdî salek berê hat avakirin. Berfîn Çîçeklîdal destnîşan kir ku wan ji bo vekirina vê komê gelek caran serî li zanîngehê dane û serlêdanên wan hatine redkirin û got: “Lê belê hevalên me nesekînin û koma me dan qebûlkirin. Gelek zext li ser zimanê me hene û tê xwestin ku Kurdî bê jibîrkirin. Armanca me ew bû ku zimanê me neyê jibîrkirin. Kom, netenê li ser Kurdî, li ser çand û dîrokê jî disekine.”
Wê ji bo roja ziman şanoyekê amade bikin
Berfîn Çîçeklîdal destnîşan kir ku xebata YYU-KURDÎ ya ewilî li ber qeraxa Gola Wanê bernameya hevnasînê bû. Berfîn Çîçeklîdal da zanîn ku çalakiya wan ya duyemîn jî şeva sînemayê bû û 2 kurtefîlm hatin nîşandan û got: “Me dît ku gelek xwendekar li stranên Kurdî guhdarî dikin, li fîlmên Kurdî temaşe dikin, lê piranî nikarin bi Kurdî biaxivin, Armanca me hinekî jî şikandina vê yekê bû. Me got belkî çandekî wisa bikeve nav xwedekaran. Di dema pêşiya me de jî em ê li ser dîrok, çand û ziman xebatan bikin. Gelek rojên girîng li pêşiya me ne, em dixwazin di roja ziman de şanoyekê amade bikin.”
‘Temsîliyeta wekhev heye’
Berfîn Çîçeklîdal destnîşan kir ku di YYU KURDÎ de di nava jin û meran de cudahî nîn e û got ku ew temsîliyata jinan esas digirin. Berfîn Çîçeklîdal bi bîr xist ku di nava jiyanê de her tim jin hatine paşguhkirin û got: “Jin, xwe her tim paşdeemayî hîs dikin. Di nava komê de tu caran me ev yek hîs nekiriye. Di nav koma me de temsîliyeta wekhev heye.”
‘Em dixwazin tenê ji bo jinan bernameyan amade bikin’
Berfîn Çîçeklîdal bi lêv kir ku jin dixwazin hebûna xwe ava bikin û wiha got: “Her tim dengê jinan tê qutkirin. Zimanê Kurdî jî wisa ye, lewma hem jin hem jî zimanê Kurdî ji bo hebûna xwe têdikoşin. Jin jî ziman jî dixwaze azadiya xwe bi dest bixe. Têkiliya mirov û ziman hê di zikê dayikê de çêdibe û têkiliya jin ango dayik û ziman divê bê fêmkirin. Lê belê ev yek divê şaş neyê fêmkirin. Ev tenê rola jinan nîn e, ya mêran e jî. Gelek hevalên me yên jin ji bo xebatên komê bi dilxwazî tên alîkariya me dikin û ev yek gelekî balkêş e. Gelek xwendekarên jin bi saya komê hev nas dikin, bi hev re dixebitin û ev yek yekgirtina jinan xurt dike. Em dixwazin di pêşerojê de tenê ji bo jinan jî çend bernameyan amade bikin.”
‘Armanca me pêşvebirina Kurdî ye’
Yûsûf Abeş jî qala armanca komê kir û diyar kir ku armanca YYU-KURDÎyê belavkirina zimanê Kurdî ya di nava zanîngehê de ye. Yûsûf Abeş destnîşan kir ku armanceke wan jî perwerdehiya Kurdî ye û wiha axivî: “Em dikarin xwendekaran fêrî Kurdî bikin. Em dixwazin nasnameya Kurdî di nava zaningehê de belav bikin, dersên Kurdî bidin. Ya rastî armanca me ew e ku em dixwazin Kurdî bikin ziman rojane yê zanîngehê. Eleqeyeke pir zêde ji bo komê heye. Di nava zanîgehê de komên din jî hene, lê ya herî zêde eleqeyê dibîne koma me ye. Wan bajarek Kurdistanê ye û xwendekar jî ji sedî 90-95 Kurd in. Lewma, eleqeyeke baş heye û em armanc dikin ku tevlibûna xwendekaran a ji bo bernameyên xwe zêdetir bikin.”
‘Divê Kurdî bibe zimanê perwerdehiyê’
Yûsûf Abeş ji bo pêşxistina Kurdî bang li hemû xwendekaran kir û got: “Divê her kes bi Kurdî bijî, Kurdî hîn bibin, bi Kurdî rabin û bi Kurdî rûn in. Daxwaza me wa ew e ku zimanê Kurdî bibe zimanê perverdehiyê ku Kurd bikaribin bi zimanê xwe biaxivin, binivisînin û bixwînin.”
