Li gorî çapemeniya Almanyayê di hevdîtinên derbarê Ûkraynayê li Berlînê berdewam dikin de pêşketin çênebû. DYA bi israr e ku Donbassê radestî Rûsyayê bikin û Ûkrayna jî vê yekê red dike.
Hevdîtinên şerê Ûkrayna û Rûsyayê li paytextê Elmanya Berlînê berdewam dikin. Li gorî çapemeniya Alman di hevdîtina de mijara serweriya axê û eniya şer xalên herî girîng in. Çavkaniyên mijarê dişopînin ji çapemeniya Alman re ragihandin ku DYA israr dike ku Donbassê radestî Rûsyayê bikin û bi wî awayî agirbest bê ragihandin. Lê Ûkrayna vê daxwazê red dike û dixwaze ku rewşa niha heyî bê cemidandin û agirbest li ser vê yekê bê çêkirin. Lê Rûsya jî vê yekê mîna paşve gav avêtin û tawîz dayînê dinirxîne û erênî nêzîk nabe.
DYAyê herêma bêçek pêşniyar kir
Çavkaniyan diyar kir ku li hemberî vê xitimînê DYAyê pêşniyarek nû anî. Li gorî pêşniyarê divê her du dewlet jî hêzên xwe ji herêmên bûne qada pevçûnê, vekişîne û ev dever bibe, ‘herêma serbest a bazirganiyê’. Lê ji ber ku di vê rewşê de hêzên asayîşê yên bi navê ‘mihafizên neteweyî’ ku girêdayî Rûsyayê ne li herêmê dimînin Ûkrayna li dijî vê pêşniyarê jî derdikeve. Li gorî agahiyên çavkaniyan dayîn li ser xitimîna hevdîtinan Ûkraynayê pêşniyar kir ku her du dewlet jî ji sînorên xwe leşkeran bikişînin. Lê heta niha di vî warî de jî pêşketinek nîne. Çavkaniyan daxuyand ku pêşniyarên heyîn nebûne bersiv û xitimîne hevdîtinan berdewam dike.
