TJAyê bi boneya mitînga “Hêvî û Azadiyê” ya li Amedê bê lidarxistin, li Wanê daxuyaniyek da. Di daxuyaniyê de hat diyarkirin ku tekane mûxatabê çareseriyê Rêberê Gelê Kurd Abdullah Ocalan e û bangî jinan kir ku tev li mitîngê bibin.
Platforma Saziyên Demokratîk a Amedê dê di 4ê Çileya 2026an de li Amedê bi dirûşma “Hêvî û Azadiyê” mitîng li dar bixe. Di mitîngê de dê azadiya Rêberê Gelê Kurd Abdullah Ocalan bê xwestin. Bi boneya mitînga li Amedê, Tevgera Jinên Azad (TJA) li Wanê, li Eywana Konferansê ya Tahir Elçî ya Wanê daxuyaniyeke nivîskî da. Gelek endam û rêveberên saziyên sivîl û partiyên siyasî tev li daxuyaniyê bûn. Daxuyanî ji aliyê aktîvîsta TJAayê Felek Erdem ve hat xwendin.
Daxuyanî bi vî rengî ye:
‘Rêber Abdullah Ocalan tekane muxatabê Çareseriyê ye’
“Weke jin em di 4ê Çileyê de li Amedê ji bo Rêber Abdullah Ocalan dimeşin ku pirsgirêka hebûna gelê Kurd gihand asteke herî jor û ber bi azadiyê ve bir û ji bo gelê kurd bû ronahiya hêviyê.
Rêber Abdullah Ocalan ku di her firsetê da banga çareseriya demokratîk a pirsgirêka Kurdan dike, tekane muxatabê çareseriyê ye. Em ji dewleta ku pergala tecrîdê ya Îmraliyê didomîne û ku hiqûqa xwe jî tune dihesibîne û bi belavkirina demê re çaresernekirinê li ser me ferz dike re dibêjin; Azadiya Rêber Abdullah Ocalan azadiya me ya jin û gelan e. Rêya çareseriya li ser heqîqetê ew e ku pergala tecrîdê ya Îmraliyê bi temamî ji holê bê rakirin. Ji bo me jinan pîvana demokratîkbûnê azadiya Rêber Abdullah Ocalan e. Pêkanîna şert û mercên azadiya rêberiya me dê rê li ber demokratîkbûn û aştiyê veke.
Ji bo Rojhilata Navîn a ku bûye qada pirsgirêka netewedewletan û ji nû ve tê dizaynkirin, paradîgmaya ku ji aliyê Rêber Abdullah Ocalan ve hatiye pêşkêşkirin ji bo jin û neteweyên bindest, girîng e. Rêber Abdullah Ocalan ku divê bi azad tevbigere û di rola xwe ya aktorê sereke de bigihîje şert û mercên xebatê, aktorê herî bingehîn e ku dê aştiya mayînde ya Rojhilata Navîn jî misoger bike. Li ser vê em bang li dewletê dikin ku daxwaz û pêdiviyên edaletê pêk bîne.
Li gorî biryarên binpêkirinê yên ku di çarçoveya “ mafê hêviyê” de hatine dayîn, divê Tirkiye rêziknameyên qanûnî yên ku dê guhertinên binyadî çebike pêşkêş bike û di vê çarçoveyê de divê demildest mekanîzmayên ku azadiya Rêber Abdullah Ocalan misoger bike, ava bike.
Em Jin bi şaristaniya dewletê re di bin zexta şer, xizanî û zordariyê de me sedsal wenda kir. Me bi perspektîf û têkoşîna Rêbertiya xwe dest bi lêgerîna azadiyê kir û got “Pirsgirêka jinan yek ji pirsgirêkên herî girîng e”. Me azadiya xwe ji azadiya civaka xwe cuda nekir. Lê em dizanin ku azadiya me tenê bi azadiya Rêber Abdullah Ocalan pêk tê. Niha dem hatiye ku gelê Kurd pirsgirêka hebûnê derbas kiriye; Dem dema bi rêbertiyeke azad re bi hevrebûna civakeke azad e. Ji bo serkeftina pêvajoya aşitî û civaka demokratîk, çekirina qanûnên aşitî û azadiyê û pêkanîna prensîba mafê hêviyê hewcehiyeke serekeye.
Li ser vê bingehê em hemû jinên Kurdistanê vedixwînin mîtînga Hêvî û Azadiyê ku di 4ê Çileyê de dê li Amedê bê lidarxistin.Werin em bi hezaran jin di korteja xwe de bi hev re bin û wekî lehiyê biherikin meşa azadiyê.”
