Navenda Ragihandinê ya QSDˋê daxuyand ku dewleta Tirk bi çeteyên rêxistina ˋHuras El Dînˊ êrişî gundewarê başûrê rojhilatê bajarê Minbicê kir û bi SÎHAyan Bendav Tişrîn û derdora wê bombebaran kirin.
Navenda Ragihandinê ya Hêzên Sûriya Demokratîk (HSD) der barê êrişên çeteyên dewleta Tirk ên li dijî gundewarê Minbicê û Bendava Tişrînê de daxuyaniyek da.
Daxuyaniya HSDê wiha ye:
“Bi beşdariya bi sedan endamên rêxistina ˋHuras El Dînˋ ên ji hemwelatiyên Ozbekî, Tirkistanî û Çeçenî ne û dewleta Tirk a dagirker û çeteyên wê êrişeke dijwar li dijî gundewarên başûr û rojhilatê bajarê Minbicê û gundewarê Bendava Tişrînê pêk anî. Hêzên me bersiva êrişan da û bi dehan çete hatin kuştin û birîndar bûn.
Vê sibehê, bi piştgiriya 5 balafirên biçek bêmirov (SÎHA) ên dewleta Tirk a dagirker, tank û panzerên nûjen komên çete êrişî gundên Etşanê, Seîdîn, Xirbet Tiwênê, Mihşiyet El Şêx Ubêd El Mistefa, Xirbet Zemale, Mestaha, Girê Siryatel û gundê Eloş ên başûrê rojhilatê bajarê Minbicê kirin. Şervanên me tevahî êriş têk birin, bi dehan çete kuştin, di nav de tankek û 2 erebeyên doçka li ser bi giştî 6 wesayîtên leşkerî rûxandin.
Şervanên me yên ku li dijî dagirkeriya Tirk û çeteyên wê berxwedaneke mezin raber dikin, singesing li hember çeteyan şer kirin. Dê Navenda Ragihandinê ya QSDˋê dîmenên pevçûn û rûxandina wesayîtan piştre parve bike.
Ji bo ku binketina êrişên çeteyan veşêre, dewleta Tirk a dagirker bi balafirên bêmirov û çekên giran Bendava Tişrîn û derdora wê gelek caran bombebaran kirin. Hin parçeyên bendavê zirar dîtin. Li hember xeteriyên li ser bendavê û derdora wê dagirkeriya Tirk berpirsiyar e.”
