Amed – Rêveberê TOD-DERê Mahsûm Ozaksoy ku hevdîtina bi Rêberê PKKê Abdullah Ocalan re nirxand, diyar kir ku banga Abdullah Ocalan girîng e û got: “Ji bo ku ev gel, ev civak ji vê nexweşiyê pak bibe divê bê şert û merc em piştgiriya vê bangê bikin.”
Rêberê PKKê Abdullah Ocalan 26 sal in di bin şert û mercên giran ên tecrîdê de li Girtîgeha Tîpa F a Ewlekariya Bilind a Îmraliyê tê ragirtin. Biraziyê Abdullah Ocalan, Omer Ocalan piştî 4 sal û nîvan di 23yê Cotmehê de di çarçoveya hevdîtina malbatê de bi Rêberê PKK’ê Abdullah Ocalan re hevdîtin kir.
Dû re Şandeya Partiya Wekhevî û Demokrasiyê ya Gelan (DEM Partî) ku ji Pervîn Bûldan û Sirri Sureyya Onder pêk dihat di 28ê kanûnê de çû Girtîgeha Tîpa F a Ewlehiya Bilind a Îmraliyê û li wir bi Rêberê PKKê Abdullah Ocalan re hevdîtin kir. Şandeyê piştî hevdîtinê di 29ê kanûnê de fikir û nêrînên Abdullah Ocalan bi daxuyaniyeke nivîskî ji raya giştî re parve kir. Abdullah Ocalan di peyama xwe de li ser 7 xalan rawestiya bû û got “Ji bo Tirkiye û herêmê dem dema aştî, demokrasî û xwişk û biratiyê ye.”
‘Ev pirsgirêk sed sal in berdewam dike’
Rêveberê TOD-DERê Mahsûm Ozaksoy diyar kir ku hevdîtina hatiye kirin girîng û pêwîst dibinin û wiha got: “Ev hevdîtin bi tena serê xwe ne bes e. Ev pirsgirêk bi sed sal in berdewam dike. Pirsgirêka kurd li Rojhilata Navîn pirsgirêkeke mezin e. Ji ber wê hevdîtin girîng e. Weke komele ji bo aştî û diyaloga civakê çi bikeve ser milê me em ê bikin.”
‘Banga birêz Abdullah Ocalan pêdiviyek e’
Mahsûm Ozaksoy, bal kişand ser gotina Rêberê PKKê Abdullah Ocalan a “Ji bo pêvajo bi ser keve, hemû derdorên siyasî yên li Tirkiyeyê bêyî ku bikevin nava hesabên demkî û teng, hewceye înîsiyatîfê li xwe bigirin, çêker nêz bibin û ji hêla erênî ve sûdewer bin” û ev tişt got: “Em qedr û qîmet didin vê bangê. Banga birêz Abdullah Ocalan pêdiviyek e. Divê ev bang li hewayî nemîne. Divê sazî û dezgehên sivîl tene berjewendiya gelan û civakê li ber çavan bigirin. Berjewendiya şexsî me nagihîne tu merheleyan. Ji ber van berjewendiyên şexsî ev pirsgirêk sed sal in didome. Ji bo ku ev gel ev civak ji vê nexweşiyê derkeve divê bê şert û merc em piştgiriya vê bangê bikin.”
‘Yekane sedema pirsgirêkên li Tirkiyeyê pirsgirêka kurd e’
Mahsûm Ozaksoy, diyar kir ku çareserkirina pirsgirêkên li Tirkiyeyê, Kurdistanê û Rojhilata Navîn bi çareserkirina pirsgirêka kurd re derbas dibe û wiha domand: “Yekane sedemê pirsgirêkên li Tirkiyeyê yên weke aborî, bêedaletî û tevahiyan pirsgirêka kurd e. Heta ku ev pirsgirêk neyê çareserkirin. Ku çareserkirina wê girêdayî mûxatabê wê ye. Birêz Abdullah Ocalan jî di vî warî de gavên baş avêtine. Dibêje ‘ez ji bo vê yekê amade me.’ Heke ev pêk were dê ev pirsgirêk tev ji holê rabin û gel û civak dê qezenc bike. Ji xwe derketina bingehîn a komeleya me jî aştî û diyaloga di nava gelan de ye. Ji ber vê yekê em ji vê bangê pir serfiraz in.”
‘Ji bo ku aştî pêk bê divê em bi israr bin’
Mahsûm Ozaksoy, xwest ku nîqaşên heyî bi awayekî zelal bên kirin û axaftina xwe wiha bi dawî kir: “Ji bo ku ev pêvajo xweşik bimeşe mûxatabên vî karî diyar in. Divê partiya mûxalafet û partiyên din jî berjewendiyên xwe bidin aliyekî û berjewendiyên welat bigirin berçav. Divê yekane armanca me aştî be. Diyalog bê meşandin û encama vê diyalogê bi aştiyeke mayînde encam bigire. Ji bo ku aştiya gelan pêk bê divê em bi israr bin. Em aştiyê ji gelan re pir pêwîst dibinin. Em bi hêvî ne ku encam dê baş be.”
