Rojnameger Argeş Gewda têkildarî êrişên çeteyên Hikûmeta Demkî ya Şamê û Tirkiyeyê diyar kir ku çete êrişî sivîlan dikin û wiha got: “Hêzên Ewlekariya Hundirîn di bingeha parastina rewa de bersiva êrişan didin. HSD li taxan nîn e, dixwazin Kurdan ji taxan derxin.”
Êrişên komên çete yên girêdayî Hikûmeta Demkî ya Sûriyeyê û Tirkiyeyê yên li dijî taxên Şêxmeqsûd, Eşrefiyê û Benî Zêdê bênavber didomin. Di topbarana çeteyan a vê şeveqê de li taxa Benî Zêdê 2 welatî birîndar bûn. Hêzên Ewlekariya Hundirîn birîndaran rakir nexweşxaneyê. Rojnameger Argeş Gewda têkildarî êrişên çeteyan ên li dijî taxên Eşrefiye, Şêxmeqsûd û Benî Zêdê ji ajansa me re axivî. Rojnameger Argeş Gewda yê niha li Bakur û Rojhilatê Sûriyeyê geşedanan ji nêz ve dişopîne destnîşan kir ku dewleta Tirk zextan li hikûmeta Sûriyeyê dike ku êrişî gelê Kurd bike.
‘Dixwazin peymanê xera bikin’
Argeş Gewda bi bîr xist ku di 27ê Mijdara 2024an de li seranserî Sûriyeyê guhertinên bingehîn çêbûn û anî ziman ku piştî hilweşandina rejîma BAASê û anîna çeteyên HTŞê ya li Hikûmeta Demkî ya Şamê gelek guhertin çêbûn. Argeş Gewda bal kişand ser êrişên li ser Taxên Şêxmeqsûd, Eşrefiye û Benî Zêdê û wiha got: “Li Şexmeqsûd û Eşrefiyeyê êrişeke domdar hate destpêkirin. Berê jî çend caran komên çete yên girêdayî Hikûmeta Demkî êrişî van taxan kiribûn. Dema ku mirov li dîroka van êrişan dinêre. Kengî peymanek di navbera Rêveberiya Xweser û Hêzên Sûriyeya Demokratîk (HSD) û Hikûmeta Demkî de pêk were êrişên wiha tên destpêkirin. Ev jî rastî berxwedana Hêzên Ewlekariya Hûndirîn û gelê Şêxmeqsûd û Eşrefiyeyê hat. Ev êriş li dijî sivîlan pêk tên.”
‘Di nav şehîd û birîndaran de zarok jî hene’
Argeş Gewda bal kişand ser peymana ku li ser Taxên Şexmeqsûd û Eşrefiyeyê di sala 2025an de di navbera HSDê û Hikûmeta Demkî de pêk hat û wiha domand: “Li gorî vê peymanê tu şervanên HSDê li taxan nemane. Hêzên li taxan girêdayî Hêzên Ewlekariya Hundirîn in û ji gelên Taxa Şêxmeqsûd û Eşrefiyeyê pêk tên. Ji ber vê yekê agahiyên li ser televizyonên hikûmetê û sazî û dezgehên girêdayî wê tên dayîn xelet in û derew in. Fermandariya HSDê, Hevserokên Rêveberiyên Xweser û her du taxan derbarê mijarê de daxuyanî dan. Ji bo ku çeteyên girêdayî hikûmetê êrişên xwe rewa bikin dibêjin ‘me êriş ne daye destpêkirin bersiva êrişan daye’. Ev yek ne rast e. Em bi gelek welatiyan re axivîn. Gelek hevalên me yên rojnamevan jî li hundir hene, em bi wan re di têkiliyê de ne. Dibêjin ev êriş li dijî gelê sivîl pêk hatin û di nav şehîd û birîndaran de zarok jî hene.”
‘Daxwaza gel ew e ku xwe bi xwe bi rê ve bibe’
Argeş Gewda anî ziman ku dewleta Tirk zextan li Hikûmeta Demkî ya Sûriyeyê dike ku êrişî HSDê bikin û destnîşan kir ku armanca dewleta Tirk ew e ku dest bi avêje deskeftiyên gelê Kurd. Argeş Gewda da zanîn ku şer û pevçûnên li Taxên Şêxmeqsûd û Eşrefiyeyê berdewam dikin û wiha pê de çû: “Hêzên Ewlekariya Hundirîn di bingeha parastina rewa de bersiva êrişan didin. Daxwaza gel ew e ku xwe bi xwe, bi rê ve bibe. Ev daxwaz ji aliyê Hikûmeta Demkî ve tê astengkirin. Niha şehîd û birîndar hene. Gelek ji wan sivîl in. Ji ber vê yekê divê ambargoya li ser wan taxan bê rakirin. Bêyî ku şer û pevçûn mezin bibin divê bi dan û standin û guftogoyan êriş bên sekinandin.”
