Bi hezaran welatiyên Qamişlo, Amûdê, Tirbespiyê û Til Hemîsê ji bo fermandarê Hêzên Ewlekariya Hundirîn ê Helebê Ziyad Heleb meşiyan û cangoriyên Şêxmeqsûd û Eşrefiyeyê bi bîr anîn.
Li bajarê Qamişloyê ji bo fermandarê Hêzên Ewlekariya Hundirîn ê taxên Şêxmeqsûd, Eşrefiyê û Benî Zêdê yên Helebê; Ziyad Heleb bi beşdariya hezaran kesan meşek hat lidarxistin. Hemwextî merasîma oxirkirinê ya li bajarê Kobanê, welatiyên ji bajarên Qamişlo, Amûdê, Tirbespiyê û Til Hemîsê bi pêşengiya Însiyatîfa Gel bi dirûşma “Em bi ruhê berxwedana Şêxmeqsûd û Eşrefiyê azadiya gelan ferz bikin” ji Çerxerêya Osman Sebrî heta Qada Şehîd Rûbar meşiyan.
Di meşê de dirûşmên “Bijî berxwedana Şêxmeqsûd û Eşrefiyê”, “Bi can bi xwîn em bi te re şehîd, “Şehîd namirin”, “Berxwedan jiyan e” û “Şehîd Ziyad namire” hatin berzkirin. Her wiha pankartên bi nivîsên şermezarkirina sûcên li Şêxmeqsûd û Eşrefiyê û piştgiriya gelên her du taxan hatin vekirin. Tevî bi hezaran şêniyên her çar bajaran ên ji hemû pêkhateyan, xwendekar, jin, kesên bitemen, nûnerên saziyên civaka sivîl, Rêveberiya Xweser û partiyên siyasî tev li meşê bûn.
Hevserokê Meclîsa Malbatên Şehîdan a Kantona Cizîrê Mahsûm Hesen li Qada Şehîd Rûbar axivî û cangoriyên berxwedana Şêxmeqsûd û Eşrefiyê bi bîr anî.
Meş bi berzkirina dirûşmeyan bi dawî bû.
