DEM Partî ya Manîsayê ji bo şermezarkirina hewldanên qirkirinê û êrişên li ser Rojava daxuyaniya çapemeniyê û meş li dar xistin.
Rêxistina DEM Partiyê ya Manîsayê, ji bo şermezarkirina êrişên çeteyên HTŞ û SMOyê yên li ser rojavayê Kurdistanê, li Parka Ahmet Kaya ya li taxa Fevzi Çakmak a girêdayî navçeya Yunusemreyê kom bû.
Di çalakiyê de pankartên bi nivîsên “Xwedîderketina li Rojava, xwedîderketina li mirovahiyê ye” û “Rojava wijdan e, berxwedan e, azadî ye. Teslîm nayê girtin” hatin vekirin.
Girse ji Parka Ahmet Kaya ber bi qada Horozkoyê ve dest bi meşê kir. Di meşê de dirûşmên wek “Rojava Rojhilat e Kurdistan yek welat e”, “Jin şer naxwazin, aştî dixwazin” û “Bijî berxwedana Rojava” hatin berzkirin.
Meş bi hinceta ku “meş qedexeye” ji aliyê polîsan ve hat astengkirin. Li ser vê yekê girseyê meşa xwe bi dawî kir û li vir daxuyanî da çapemeniyê.
Daxuyaniya çapemeniyê ji aliyê Hevseroka DEM Partiyê ya Manîsayê Evîn Gunselê ve hate xwendin. Evîn Gunselê bal kişand ser êrişên çeteyên HTŞ û SMOyê yên li ser taxên Şêxmeqsûd û Eşrefiyeyê yên Helebê û rojavayê Kurdistanê û got: “Ev êriş armanca tunekirinê digirin û rasterast jiyana sivîlan dikin armanc. Êriş, berdewama kiryarên ku berê li hember civakên Durzî û Elewî hatine kirin in.”
Evîn Gunselê di berdewama daxuyaniyê de got: “Em careke din ji navçeya Yunusemre ya Manîsayê diyar dikin; em bi gelên Rojava re di nava hevkariyê de ne. Ji bo parastina perspektîfa civaka demokratîk, destkeftiyên gelan û ji bo rawestandina qirkirinan, em ê têkoşîn û hevkariyê bidomînin.”
