Bi hezaran Kurd û dostên Kurdan li Vancouverê ber bi konsolosxaneya DYAyê ve meşiyan û gotin: “Rojava xeta me ya sor e.”
Li dijî êrîşên çeteyên HTŞ û DAIŞê ku Tirkiye piştgiriyê dide wan, li bajarên Toronto û Vancouverê yên Kanadayê bi hezaran Kurd û Kurdistanî meşiyan. Bi bangê Navendên Civaka Kurd a Kanadayê, bi sedan Kurdistanî li hev civiyan, êrîşên li ser Rojava protesto kirin û ragihandin ku dê çalakiyên xwe bênavber bidomînin.
Girseya ku li Toronto û Vancouverê li hev civiya, bi dirûşme û stranên şoreşgerî ber bi konsolosxaneya DYA’yê ve meşiya. Di dema meşê de dirûşmeyên “Bijî Rojava”, “Bijî Kurdistan” deng veda. Çalakvanan gotin ku dê biryara çalakiyên bênavber li seranserê Kanadayê bidomînin.
Rojava xeta kurdan a sor e
Piştî çalakiyê di daxuyaniya hat dayîn de, hate gotin ku Rojava ji bo gelê Kurdistanê nirxekî ku nayê berdan e û ev yek hate ziman:
“Rojava xeta me ya sor e. Bila kes hêvî nekin ku em li hemberî dagirkirina Rojavayê bêdeng bimînin. Her piştgiriya ku ji HTŞê re tê dayîn -ku navê xwe guherandiye lê DAIŞ e- xiyanet li Kurd û Kurdistanê ye.”
Di daxuyaniyê de bal hate kişandin ser siyaseta hevsengnebûna ya dewletên rojava jî. Hate gotin ku dewletên ku duh van rêxistinan wekî terorîst binav dikirin, îro wekî aktorên rewa qebûl dikin, ev yek careke din bê rêgeziya hêzên navneteweyî nîşan dide.
‘Dewletê baweriya xwe winda kir’
Hate destnîşankirin ku dewletên ku pêşî piştgirî didin tevgera gel a Rojhilatê û paşê ji ber berjewendiyên xwe paş ve vedikişin, baweriya xwe di nav gelan de winda dikin û ev gotin hatin ziman:
“Gelê Kurd li hemberî rêxistina herî hov a cîhanê DAÎŞ’ê mirovahiyê parast. Lê belê tenê hiştina Kurdan şaşiyeke mezin e. Ev gel vê yekê ji bîr nake.”
Banga piştgiriyê kirin
Di daxuyaniyê de hate destnîşankirin ku gelê Kurd dê vê serdema tarî bi yekîtî û piştgiriyê derbas bike û wiha hate gotin: “Dostên rastîn ên Kurdan dîsa ew bi xwe ne û hevgirtina gelan e. Îro ji her demê zêdetir dem hatiye yekîtiyê.”
Çalakî bi marş û dirûşmeyan bi dawî bûn, saziyên Kurd ên li Kanadayê bangên berxwedan û çalakiyên bênavber careke din dubare kirin.
