Şervanên HSDê û YPGê yên li eniyên berxwedanê ne çalakî û xwepêşandanên çar aliyên Kurdistanê silav kirin û ev peyam dan: “Berxwedana me hêz dide me, em gelê xwe yê Başûr, Bakûr, Rojhilat û Ewropayê silav dikin. Em pişta xwe didin gelê xwe, me biryara serkeftinê daye.”
Li gorî nûçeya ANHAyê; şervanê Hêzên Sûriya Demokratîk (HSD) û Yekîneyên Parastina Gel (YPG) ên li eniya gundê Til Barût a bi ser Hesekê û Reqayê ve têkildarî çalakiyên gel ku li çar aliyên Kurdistanê û Ewropayê didomin, peyamek bi dîmen dan.
Peyama şervanên ku berxwedana gel silav dikin bi vî rengî ye:
“Em ji her çar aliyên Kurdistanê re silavên xwe dişînin. Bi taybetî gelê me yê Başûrê Kurdistanê sînor ji holê rakir. Gelê me yê Ewropayê bi çalakî û manawiyata xwe moralek mezin dide me. Gelê me yê Bakurê Kurdistanê, bi taybetî gelê me yê Nisêbîn û Pirsûsê çalakiyên mezin li dar xistin, em berxwedana wan silav dikin.
Berxwedana wan hêz dide me, li eniyên şer ne zivistan, ne serma ji bo me nabe astengî, manewiyata gelê me têrî me dike.
Heta ku gelê me li pişta me be, dijmin kî dibe bila bibe, em ê wan têk bibin. Çeteyên DAIŞê dixwazin li ser gelê me komkujiyan pêk bînin, lê çi dibe bila bibe em destûra viya nadin.
Em careke din gelê xwe yê Başûr, gelê Silêmanî, Hewlêr û Zaxo silav dikin. hebûna we ji bo me manewiyatek mezin e. Me biryara serkeftinê daye. Em ji gelê xwe re serkeftinê dixwazin. Ji bilî berxwedan û serkeftinê rêyek din nîn e. Em pişta xwe didin gelê xwe, hêza gelê me têrî me heye.”
