Êrîşên li ser Rojava ji çar aliyên cîhanê rastî bertekan tê. Ji Şilî bigrin heta Japonya û Somaliyê çalakî û daxuyaniyên piştgiriyê ji bo Rojava hatin.
Êrîşên çeteyên DAIŞ’ê ku desteka xwe ji dewleta Tirk digrin li dijî Bakur û Rojhilatê Sûriyeyê didomin. Li dijî van êrîşan li seranserê cîhanê bertek jî zêde dibin. Wek tê zanîn di rojên borî de çeteyek DAIŞ’ê dîmenê keziya porê jineke şervan ku jê kirbû diyarî kir di medyaya dîjîtal de hat parvekirin hat bibîrxistin.
Li dijî dîmenê ku hat parvekirin, jinên li seranserî cîhanê bi kampanyaya “KeziyênMeTirsaWe” bertek nîşan dan û dîmenên hûnandina porê xwe parve kirin. Kampanya di demek kin de belavî hemû cîhanê bû, jinên ji welatên cuda peyam dan ku ew bi jinên Kurd re ne.
Jinên Şiliyê ku yek ji welatên Emerîkaya Latîn e, beşdarî kampanyayê bûn û bi dîmenê bi etîketa “KeziyênMeTirsaWe” banga piştevaniyê mezin kirin û berxwedana Rojava silav kirin.
Ji Arizonayê berxwedana Rojava silav kirin
Bi sedan Kurdistaniyên li bajarê Tuscon ê eyaleta Arizona ya DYA’yê ji bo şermezarkirina êrişên li ser Rojava li hev kom bûn. Di çalakiyê de ya li ber Jacome Palayê dirûşma ‘Êdî bes e’ hate qîrîn.
Girseya gel ku ji bo şermezarkirina êrişên li ser Rojava li hev kom bû, bi deqeyeke rêzgirtinê ya ji bo bîranîna şehîdên şoreşê yên Kurdistanê dest bi çalakiyê kir.
Di çalakiyê de dirûşmên ‘Bijî berxwedana Rojava”, “Bijî Rojava”, “Defend Rojava, Defend Kurdistan”, “Terorîst Colanî”, “Terorîst Erdogan” hatin qîrîn û pankart û dozên ku êrişan şermezar dikin hatin hildan.
Di daxuyaniya çapemeniyê de ya li ber Jacome Plaza hate dayin, bêdengiya Dewletên Yekbûyî yên Emerîkayê (DYA) û hêzên bi bandor ên li herêmê ya li pêşberî êrişên li ser Rojava weke “Şermeke li dijî rûmeta mirovahiyê” hate pênasekirin.
Di daxuyaniyê de têkoşîna Kurdan a li dijî DAÎŞ’ê hate bibîrxistin û hate gotin, “Jinedîtîhatina êrişên HTŞ’ê ya ji ber berjewendiyan, cihê şermê ye.”
Çalakî li ber Federal Building bi dawî bû. Têkildarî rewşa li Rojava dosyayek radestî rayedaran hate kirin.
Ji çalakvanên Japonyayê peyamên piştgiriya Rojava
Dengek xûyayî ji welatê Japonyayê hat. Li bajarekî Japonyayê komeke çalakvanan çalakiyeke piştgiriya gelê Kurd li dar xist. Çalakvanan pankartên “Jin, Jiyan, Azadî” û “Rojava biparêzin” vekirin û peyamên piştgiriyê dan.
Çalakvaneke ji Somaliyê piştgirî da gelê Kurd
Çalakvana ji Somalî Leyla Cami li dijî êrişan piştgiriya xwe ji gelê Kurd re anî ziman.
Leyla Cami ku peyameke bidîmen weşand, wiha got: “Gelê Kurd rû bi rûyî şerekî demdirêj e ku gefan li jiyana wan û mafên wan ên bingehîn dixwe. Şer berdewam e. Ev yek dibe sedema bêîstiqrariya siyasî ku sivîlan û rûmeta wan dixe bin gefan. Ji bo mîsogerkirina ewlehiya Kurdan û berdewama jiyana wan divê piştgiriya Kurdan bê kirin.”
Leyla Cami bang li civata navneteweyî kir ku hewldanên parastina aştiyê bidomînin, êşên mirovî li herêmê kêm bikin, li rex mafên mirovan bisekinin. Her wiha got: “Erka me hemûyan e piştgiriyê bidin. Her piştgiriyeke rasteqîn guhertinê çêdike.”
Karavana Gel ber bi Rojava ve bi rê ket
Di vê navberê de Karwana Gel a RiseUp4Rojava ku ji kolektîfên şoreşger pêk tê ji bo piştgiriya Şoreşa Rojava ji gelek bajarên Ewropayê bi rê ketin. Enternasyonalîstên ji welatên cuda, di serî de ji Elmanya, Fransa û Îtalyayê, ber bi Kobanê ve ketin rê. Pauline, ku ji Lozanê tevlî Karwana Gel bû, armanca tevlîbûna xwe anî ziman.
