Meclisên Dayikên Aştiyê yên Amed, Mêrdîn, Riha û Êlihê li Amedê kom bûn û ji dewletê xwest ku ji bo aştiyê gavên erênî û ji dil bavêjin. Dayikan xwestin ku êdî gerîlla û leşker neyên kuştin û şer bi dawî bibe.
Endamên Meclisa Dayikên Aştiyê yên Êlih, Mêrdîn û Rihayê hatin li Amedê kom bûn û têkildarî hevditina heyeta DEM Partiyê ya bi Rêberê PKKê Abdullah Ocalan re daxuyanî dan. Dayikên Aşitiyê destnîşan kirin ku dewlet ji bo çareseriyê û aştiyê ne samîmî ye û xwestin her kes ji bo aşitiyê têbikoşe.
Li ser navê dayikên Êlihê Meyase Akdag di çalakiyê de axivî û got: “”Ez him dayika aşitiyê him jî dayika şehîdan im. 27 sal in ez ji bo aşitiyê têdikoşim.
Xwîn bi xwînê nayê şûştin. Xwîn bi avê tê şûştin. Ez bangî dayikên tirk jî dikim, bila esker jî polîs jî neyên kuştin. Bila gerîla jî neyên kuştin êdî bes e. Werin em hemû li dijî vê zilmê rabin. Ez ji vir heta serê çiyan silav û rêzên xwe ji şervanên li çiyê re dişînim. Zarokên me ji ber zilm û zordariyê çûne serê çiyan. Ji kêfa neçûne.”
Dayika Aşitiyê Raife Ozbek jî li ser navê Dayikên Aşitiyê yên Amedê axivî û got: “Îro Recep Tayip Erdogan li Amedê ye. Em wek dayikên aştiyê li vir bangî wî dikin. Yekane daxwaza me aştiye. Aştî tiştekî pir xweş e. Bila tu kes ji aştiyê nerevin û aştiyê piçûk nebinin. Îro di vî şerî de gerila jî, gel jî her kes dimire. Tırkiye bi salan e zilmê li me dike. Em dibêjin êdî bes e. Bi trilyonan pere Tirkiyeyê diçe vî şerî, ji ber vê evqas feqîrî heye. Tu qezenca şer ji bo kesî tune ye. Em wek dayikên Aşitiyê bi salan e deste xwe dirêjî dayikên leşker û polîsan dikin. Lê deste me li hewa dimîne. Ev nêzîkatiyeke nerast e. Zarokên me jî yên wan jî dimirin. Lazim e ew jî aştiyê bixwazin û destê xwe bidin destên me. Em bi hev re aştiyê pêk bînin. Em dixwazin êdî bes xwîn birije.”
Li ser navê dayikên Aşitiyê yên Rihayê Meyase Korkmaz jî axivî û wiha got: “40 sal in Dayikên Aşitiyê daxwaza aştiyê dikin. Ez bangî dayikên tirk, kurd, elewî, ermenî hemû dayikan dikim. Deste xwe bidin destên me. Em bi hev re aştiyê bixwazin. Em dayikên aştiyê û dayikên şehîdan in. Em ê canê xwe bi qurbana zarokên xwe bikin. Em dibêjin xwîn bi xwînê nayê şûştin, xwîn bi avê tê şûştin. Dayik li ser piya nin û ji bo zarokên xwe têdikoşin. Rêya zarokên me rêya têkoşîn û berxwedanê ye. Ez li vê derê hemû berxwedêran silav dikim.”
Li ser navê dayikên Aşitiyê yên Mêrdînê jî Tenzîle Akatay axivî û got: “Em li dijî şer in. Em aştî û azadiyê dixwazin em qetlîaman naxwazin. Ez li vir bang dayikên esker û polîsan jî dikim dibêjim bes e. Êdî hûn jî li dijî vî şerî derkevin. Bila ne zarokên we ne jî yên me bimirin. Îro dewletê destê xwe dirêjkir. Lê ne samîçî ne. Em dibêjin divê hûn samîmî bin, gavên erênî bavêjin. Daxuyanî bi dirûşmên “Dayik şer naxwazin. Aşitî dixwazin.” û “Jin jiyan azadî” bi dawî bû.”
