Girtiyên Apoyî, Komploya Navneteweyî ya 15ê Sibatê bi daxuyaniyekê şermezar kir û wiha got: “Hêzên komploger dest ji planên xwe bernedane. Lewma divê li her derê em li dijî mantiq û planên van hêzên komploger, bi hestiyar bin û di nava çalakiyan de bin.”
Girtiyên Apoyî yên li girtîgehên Kurdistanê û Tirkiyeyê li ser navê Denîz Kaya daxuyanî da û hêzên tarî yên di Komploya Navneteweyî ya 15ê Sibatê de cih girtîn, şermezar kir. Têkildarî armancên Komployê agahî hatin dayîn û wiha hate gotin: “15ê Sibata 1999an di şexsê Rêbertiya me de li dijî gel û tevgera me li çapa navneteweyî komplo hate rêxistinkirin. Ev komplo êrîşeke qirkirinê bû ku nexwest hêviyeke biçûk jî li holê bihêle. Ji bo pûçkirina komploya navneteweyî ya ku pêşbînî dikir gelên Anadolû û Mezopotamyayê li dijî hev sor bike, Rêbertiya me ked û hewldaneke bêhempa raber kir û nehişt hêzên komploger bigihijin armanca xwe. Di serî de Halît Oral, Aynur Artan û Selamet Menteş bi şîara ‘Hûn Nikarin Roja Me Tarî Bikin’ li dora Rêbertiya me xeleka ji agir çêkirin û darbeya ewilî ya herî xurt li mantiqê hêzên komploger xistin. Bi milyonan kesî bi gotina ‘yan em ê bibin topa agir û bi Rêbertiya xwe re azad bijîn, yan jî em ê qet jiyan nekin’ qîr kirin û bi Rêbertiya me re bûn yek.”
Di daxuyaniyê de hate bi bîr xistin ku Abdullah Ocalan hişmendiya modernîteya kapîtalîst dahurandiye û alternatîfa wê daniye holê. Daxuyaniyê wiha berdewam kir: “Rêbertiya me mantiqê sîstema şaristaniyê ji kûrahî ve çareser kir û nîşanî her kesê dost û dijmin da ku divê çawa li dijî hêzên komploger berxwedan were raberkirin. Tarzekî welê esas girt ku Girava Îmraliyê ji bo avakirina yekîtiya stratejîk a gelên Anadolû û Mezopotamyayê veguherand baregeheke sereke û ev tarz bi her kesê da qebûlkirin. Îro jî heman hêzan li dijî hemleya çareseriya demokratîk û aştiyê ya ji aliyê Rêbertiya me ve hatî destpêkirin, plana komployeke nû xistin dewrê ku di şexsê Rojava de şerê Kurd û Ereban armanc kir. Hem hewldana Rêbertiya me ya li Îmraliyê, hem jî biryara berxwedana topyekûn a gel û tevgera me, ev plan di rêjeke mezin de vale derxist. Hêzên komploger dest ji planên xwe bernedane. Lewma divê li her derê em li dijî mantiq û planên van hêzên komploger, bi hestiyar bin û di nava çalakiyan de bin.”
Di daxuyaniyê de hêzên di komployê de rol lîstin hatin şermezar kirin û wiha hate gotin: “Em hemû hêzên tarî yên di komploya navneteweyî de cih girtine, bi kîn û nefretek mezin şermezar dikin. Di şexsê hevalên me Halît Oral, Aynur Artan û Selamet Menteş de ku di dema komployê de bedena xwe dan ber agir û ji bo pûçkirina komployê bi rola pêşengiyê rabûn, em hemû şehîdên xwe bi rêzdarî û minetdariyeke mezin bi bîr tînin.”
