Stenbol – Nûrettîn Ataman ev 33 sal û 4 meh in girtî ye û berdana wî di 13ê Gulanê de 6 mehên din hate taloqkirin. Bûrayê Nûrettîn Ataman, Masûm Kara derbarê taloqkirina berdana Nûrettîn Ataman de diyar kir ku Nûrettîn Ataman li dijî wan dibêje, ‘ez heme’ û derbarê mijarê de wiha got: “Nurettîn Ataman di hevdîtinê de ji min re gotibû ‘34 salên din jî werim girtin ez nabêjim poşman im. Xwîna min û bêhndayîna min bûye tevgera Kurd. Em girêdayî tevger û Serokê xwe ne’.”
Nûrettîn Ataman di sala 1993yan de li Amedê hate girtin û cezayê muebedê lê hate birîn. Nûrettîn Ataman ev 33 sal û 4 meh in girtî ye. Nûrettîn Ataman li Girtîgeha Yozgat, Girtîgeha Mûşê û Girtîgeha Baybûrtê hatiye ragirtin û herî dawî jî wî birine Girtîgeha Bolûyê û niha li vir tê ragirtin.
Di 13ê Gulanê de li Girtîgeha Bolûyê diviyabû Hîkmet Akbaş, Ahmed Abdî Îbrahîm, Tuncay Dogan û Nurettîn Ataman bihatana berdan lê Lijneya Îdarî û Şopandinê ya Girtîgehê berdana Ahmed Abdî Îbrahîm, Tuncay Dogan û Nûrettîn Ataman 6 mehên din taloq kir.
Masûm Kara derbarê rewşa bûrayê xwe Nûrettîn Ataman de axivî û bal kişand ser netehliyekirina bûrayê xwe.
Nûrettîn Ataman 33 sal û 4 meh in girtî ye
Masûm Kara diyar kir ku Nûrettîn Ataman di sala 1993yan de hate girtin û wiha axivî: “Nûrettîn Ataman li Amedê hate girtin û paşê ew şandin Yozgatê paşê jî li Girtîgehên Mûş û Bayburtê hate ragirtin û ji sala 2017an ve jî li Girtîgeha Bolûyê tê ragirtin. Di girtîgehê de rêveberiya girtîgehê heqê ceyran û avê ji girtiyan distîne. Berî çend salan dema behdayîna wan çend saet bûn lê her ku diçê wê demê jî kêm dikin. Mafê girtiyên Kurd tê binpêkirin. Her ku em diçin hevdîtinê herdem gardiyan li ser serê me disekinin. Nûrettîn Ataman got ku ji wan re tê gotin hûn e derkevin li pêşiya lijneya îdarî û şopandinê lê em dernakevin pêşiya lijneyê tenê îmza diavêjin kaxezekê. Jixwe em dizanin ku bi gotinên jor girtiyên siyasî tên berdan.”
‘Em girêdayî tevger û Serokê xwe ne’
Di berdewama axaftina xwe de Masûm Kara destnîşan kir ku Nûrettîn Ataman li dijî taloqkirina tehliyeya xwe serî li wan natewîne û ev tişt anî ziman: “Nûrettîn Ataman li dijî wan dibêje, ‘ez heme’. Nûrettîn Ataman 33 sal û 4 meh in girtî ye. Ev 3 sal û 4 meh e berdana wî tê taloqkirin. Nûrettîn Ataman li dijî hiqûqê di girtîgehê de tê girtin. Nurettîn Ataman di hevdîtinê de gotibû ku ’34 salên din jî werim girtin ez nabêjim poşman im. Xwîna min û behndayîna min bûye tevgera Kurd. Em girêdayî tevger û Serokê xwe ne.’ Nûrettîn Ataman her dem li gorî tevgerê tevdigerê. Piştî pêvajoya ‘Aştî û Civaka Demokratîk’ dest pê kir gelek caran me bi Nûrettîn re hevdîtin pêk anî, di hevdîtinan de Nûrettîn diyar kir ku heke dewlet dilrast nê ew pêvajoyê baş dibîne û ji min re gotibû ‘aştî herdem ji şer baştir e. Gavên ji bo pêvajoyê ji aliyê Gelê Kurd ve hatiye avêtin, em jî benda gavên dewletê ne.’ Gotinên Nûrettîn Ataman li ser pêvajoyê ev in.”
‘Em dixwazin girtî werin berdan’
Masûm Kara got ku heke pêvajo hebe divê girtî werin berdan û axaftina xwe wiha bi dawî kir: “Lihevhatin herdem baş e. Em dixwazin girtî werin berdan, di serî de divê girtiyên nexweş werin berdan. Tiba edliyê gelek caran got ‘bila girtiyên nexweş werin berdan’ lê dewlet girtiyên nexweş berneda. Îro Dewleta Tirk hiqûqê nas nakê. Malbat dixwazin girtî tavile werin berdan.
