Amed – Nûnerên rêxistinên rojnamevanan nerazîbûn nîşanî binçavkirina rojnamevanan dan û diyar kirin ku binçavkirina rojnamevanan li dijî demokrasiye ye û ew ê destûr nedin rojnamevanî û rojnamevan bên sûcdarkirin.
Zextên bêser û ber ên li ser Çapemeniya Azad berdewam dikin. Di çarçoveya lêpirsînek ji aliye Serdozgeriya Komarê ya bajarê Eskîşehîrê de hatiye destpêkirin, li gelek bajaran 9 jê rojnamevan 16 nivîskar, helbestvan, wênegir, karîkaturist hatin binçavkirin.
Li gorî lîsteya Komeleya Rojnamevanên Dîcle Firatê (DFG); navên rojnamevanên hatin binçavkirin ev in: Roza Metîna, Mehmet Uçar, Erdogan Alayumat, Tugçe Yilmaz, Bîlge Aksu, Ahmet Sumbul, Bîlal Seçkîn, Havîn Derya, Suzan Demîr.
Abdurrahman Aydin (Akademîsyen-nivîskar), Ardîn Diren (Derhêner-werger), Dogan Guzel (Karîkaturist), Hîcrî Îzgoren (Nivîskar), Omer Barasî (Werger-helbestvan), Bawer Berşev (Koordînatorê Pirtûka Kurdî), Emrah Kelekçîer (Wênegir)
Nayê zanîn rojnamevan ji çi hincetê tên tawanbarkirin. Nivîskar Hîcrî Îzgoren tevî temenê xwe yê 74 salî jî di nav kesên binçavkirî de ye. Hevserokê Komeleya Rojnamevanan a Dîcle Firatê (DFG) Selman Çîçek û Nûnerê Basin-Îşê yê Amedê Hakki Boltan der barê binçavkirinan de ji Ajansa Welat re axivîn.
‘Binçavkirina rojnamevanan pêkanînek antîdemokratîk e’
Selman Çîçek diyar kir ku li Tirkiyeyê desthilatdariya AKP-MHP’ê ketiye tengasiyek mezin û wiha got: “Êdî hatiye wî halî ku ev desthilatdarî nikare xwe bi rê ve bibe. Ji bo xwe bi rê ve bibe êrişî çapemeniyê dike, ji bo dengê civakê qut bike êrişî çapemeniyê dike. Çapemeniya Azad dengê civakê ye. Çimkî nûçeyên Çapemeniya Azad li dinyayê belav dibin. Armanca wan qutkirina dengê heqîqetê ye. Ji ber ku rojnamevanên kurd polîtîkayên desthilatdariyê eşkere dike, lewma her dem bi binçavkirinê re rû bi rû ne. Binçavkirina van hevalên me rojnamevan faşîzm e. Binçavkirina rojnamevanan lil dijî demokrasiyê ye, pêkanînên antîdemokratîk in. Demokrasî ji holê hatiye rakirin. Em ê li ber van operasyonan serê xwe netewînin û heta hetayê li ber xwe bidin.”
Banga piştevaniyê
Selman Çîçek anî ziman ku li dijî pêlên binçavkirinê piştevaniya rêxistinên rojnamevanan muhîm e û got ku ew li dijî binçavkirina rojnamevanan çiqas piştevaniyê zêdetir bikin dê ewqas xurttir bibin.
‘Em ê destûrê nedin tawanbarkirina rojnamevanan’
Nûnerê Basin-Îşê Hakki Boltan jî destnîşan kir ku êrişên niha li ser rojnamevanan pêk tên, di serdemek krîtîk de pêk hatiye û wiha axivî: “Armanc û mexseda desthilatdariyê bi van êrişan ew e ku di vê serdemê de tiştên pêk tîne, di nava raya giştî de neyê belavkirin. Desthilatdarî dixwaze di vê serdemê ku her tişt di tariyê de dihêle û ji raya giştî vedişêre, bi binçavkirina rojnamevanan dixwaze mexseda xwe bi ser bixîne. Lê wezîfeya me rojnamevanan jî ew e ku em tiştên di tariyê de û veşarî tên hiştin bi rastiya wê derxin holê. Bila desthilatdar bi binçavkirina rojnamevanan û nivîskaran, nebêje ez bi ser dikevim. Em ê destûr nedin tawanbarkirina rojnamevanan.”
‘Sûcdarkirina rojnamevanan sûcên pakêt in’
Boltan anî ziman ku sûcên dixin stûyê rojnamevanan, sûcên pakêt in û got: “Hemû sûcdariyên li ser rojnamevanan dişibin hev û hemû kopî past dikin. Desthilatdarî darazê wekî amûra zextkirinê li ser rojnamevanan bikar tîne.”
